賣地前夕，港股噚日午市升幅擴大，收報15274，升130點，成交180.66億元，期指更炒高189點，收15289，高水15點。
不過地產股除長實（001）外，其他表現唔見得特別理想，其中恒地（012）更跌0.13%至38.20元，成交達1.62億元。大市主要由中動移（941）帶動，升2.7%至37.45元。而近期調整幅度唔細嘅中遠太平洋（1199）反彈4.57%至14.85元，思捷（330）亦升2%至57.55元。
中芯（981）降低第三季度產品售價升幅及毛利率指引，被市場視為發出盈警，結果遭證券行調低評級，股價大插近10%，收1.31元，成交金額達3.05億元。
黑客話，就快到季結，股份一旦有不利消息，都會導致基金大手出貨，來鎖定利潤或減低損失，以免基金整體表現受到拖累，所以芬佬噚日沽中芯絕無手軟。雖然美林話中芯跌至大約1.27-1.36元便具吸引力，但基金剛剛出完貨，好少會立刻補倉，要撈底重有時間及機會，毋須心急。
看通跌破配股價
今年十一黃金周連住重陽假期，港府估計有730萬人進出香港口岸，將是一個超級黃金周，不過對零售股會否有幫助就好難講，好似迪士尼開張咁，零售商並唔覺顧客或者銷售多咗，就算黃金周真係生意多咗，但現時租金回升已令盈利受到到侵蝕。
看通（1059）終於出手配股，以每股0.73元配售2.4億股，集資1.75億元，用於拓展內地電子彩票務。公司表明有關業務仍待中國財政部批准，換言之暫時都未落實，而公司心急集資惹市場疑慮，該股復牌後股價即挫12.8%至0.68元，跌破配股價。
阿虎