王菲同老公李亞鵬上個禮拜一俾人傳佢哋去咗重慶，但一直冇人影到佢哋，噚日李亞鵬喺重慶機場嘅相片曝光，據提供照片嘅人透露，呢張相係一個王菲歌迷會會員電郵畀佢嘅，但係呢個歌迷當時淨係見到李亞鵬一個，冇見到王菲，可能王菲啱啱行開咗。
辟穀可排毒
至於李亞鵬同王菲去重慶嘅原因，拍戲、旅行同開酒吧呢幾樣都傳過，但最新傳出嚟嘅消息，話根據一個北京圈中人透露，王菲同李亞鵬今次去重慶係專程去拜訪當地一個非常之有名嘅風水先生做「辟穀」，所謂辟穀，即係喺嗰個高人嘅幫助之下，喺一間房入面十五日唔食嘢，重話辟穀可以調養身體，甚至可以避免災難同帶嚟好運。
馮仁昭知道香港呢幾年都興辟穀嚟減肥同埋幫身體排毒，但話同風水有關真係第一次聽。李亞鵬身形都幾fit，王菲已經偏瘦，莫非佢兩個咁都重要減肥？