章子怡拍完《藝伎回憶錄》之後，𠵱家拍緊馮小剛導演嘅新片《夜宴》。出年四月，佢就會同《十面埋伏》嘅拍檔金城武再續前緣，拍一部由中港台合資嘅武俠片《青龍偃月刀》。
程小東任武指
喺部戲入面，金城武扮關公，章子怡就做佢嘅紅顏知己。今次導演重會將關公嘅形象嚟個大變身，事關傳統嘅關公一定係留咗好長嘅鬍鬚，但金城武扮演嘅關公唔單止冇鬚，重好型仔兼浪漫！故事大概係講金城武瘋狂追求章子怡，最後重為咗佢心愛嘅女人而死，都幾淒美動人。
據知《青龍偃月刀》導演係李少紅，武指就係程小東。有份投資呢部戲嘅台灣龍祥公司老闆王應祥唔肯透露部戲嘅詳情，但今次可以搵到金城武做男主角，查實都係靠佢出面同葛福鴻（金城武經理人）攞人咋！
