河水不犯井水，只不過係DC界一廂情願！呢期紅透半邊天嘅日版903SH，早已踩過界「吸」DC客！至於韓國，最近亦有新貴Bellwave加入陣營，旗下首部到港嘅A108，同樣憑300萬像素鏡頭玩搶客！最強係加入咗ISO及曝光值等細微調校，勁有手動DC風範！今次搵嚟經驗老到嘅DC舖Sales做實地測試，由佢哋對手，再經佢把口做詳盡報告，咁大家就知道入唔入得過喇！
記者：陳國輝
攝影：譚盈傑
ImageGirl：家祺
3秒自動對焦
齋睇外形，同平時見慣嘅反屏影相手機相若。不過喺韓國機當中，具自動對焦嘅GSM手機真係唔多；同樣地，㩒半下掣就可以對焦，繼而啟動快門；對焦速度大概三秒，如果用嚟影靜態相應該幾啱，但係影動態相就未必適合喇！
影相功能比一般手機更多，例如曝光值、ISO、對比度、飽和度、銳利度，連測光方式都有，叫903SH都要甘拜下風！至於白平衡、補光燈呢類必備功能亦齊全。但初期只靠USB抄相，等到軟件Upgrade咗之後，先可以用藍芽作傳送媒介。
聽MP3喇叭炸得
A108機側有個MP3專用掣，如果想一個人靜靜哋聽，可選擇用Hands-free嚟播放；但如果希望成班朋友一齊聽，亦可以喺揭開蓋之後，啟動Speaker播放，實試感覺幾炸得，而且音效都幾細緻，用埋嚟玩MP3鈴聲，就更加過癮。記憶體方面，內置64MB，加埋外置最大對應1GBminiSD，聽歌抄相都好夠用；另外重內置JAVA遊戲，娛樂無憂！
試相區
今次揀選旺角人氣熱點朗豪坊作為測試地區，全程只係用「自動模式」嚟拍攝。究竟效果係點？即睇！
動態：有啲殘影
Model由朗豪坊玻璃門慢慢行出大街，雖然顏色幾Sharp，但對焦速度唔夠快，影出嚟嘅效果一般，人像臉部及雙手都出現殘影。
室外：顏色均勻
Model企喺朗豪坊門外試拍，人像色澤柔和，而陰影與光位嘅分布都幾平均；雖然先天性「背景顏色」有啲雜亂，但影出嚟嘅相極富立體感！
室內：整體偏暗
行入朗豪坊裏面試拍，但係表現冇咁理想。周圍嘅環境出現偏暗，而人像就偏藍；同時，背景燈光特別強烈，對比下主體較黑。
Profile
制式：GSM900/1800
體積：95×47.4×25.4mm
重量：132.5g
屏幕：26萬色內芒及/6萬5千色外芒
通話時間：300分鐘
備用時間：150小時
主要功能：310萬像素鏡頭、MPEG4錄播、MP3播放器、內置64MB、miniSD卡、藍芽、USB1.1、JAVA
恆威（27899737）
旺角DC舖實試A108
影室內相嗰陣表現普通啲！雖然呢部機有自動對焦，但係速度就唔及DC咁快；不過值得一讚，係影相功能幾多，連曝光、ISO值都有調校，十足Manual相機咁，較手動模式會幾好玩！
變成相機取景器嗰時，屏幕顏色與肉眼所見嘅好接近，顏色幾準，而且Preview唔窒格；但係㩒快門掣影相，反應就出現延緩，而且睇相要出番主目錄先得，唔及DC有個QuickView咁方便喎！
