近期時富投資（1049）一系3隻股份似乎各有搞作，繼早排實惠易名做時惠環球（996）收購大陸物業後，在創業板掛牌的時富金融服務（8122）亦靜極思動，喺上周公布收購網上遊戲業務。
消息公布後，時富金融股價上周五一度炒高升至0.60元，但未幾大沽盤就殺到，而且間間都係外資大行，令隻股倒跌5.05％收場，收0.47元。
經紀陳話，時富金融上周五股價雖然先升後跌，但唔代表市場唔受落網上遊戲呢個古仔，單睇成交股數1.85億股，金額7943萬元，就睇得出沽盤雖然好大，但買盤都唔弱。唔好忘記隻股有一段長時間低迷，而喺停牌之前，股價急升咗好多，有人趁股價炒高獲利亦屬正常，作為財技高手嘅時富系成員，斷估唔會咁快就玩完，江湖傳聞稍後公司會有推介活動。
不過，小初就另有諗法，時富金融一直做開股票行，早幾前年花過唔少錢推廣招攬客戶，今次公司似乎玩緊轉型，唔知投資者會點諗，而公司又使唔使交代清楚呢？
慕容小初