今日又收到紅炸彈！身邊朋友紛紛出嫁，我嘅壓力就愈來愈大。就快三十歲人，拖都未有得拍。記得上個星期Eliza同我食Lunch，見佢生咗個女之後，嗰種母愛毫不自覺咁滲出嚟。大家係大學同學，𠵱家一個係幸福媽媽，一個就係so-called單身貴族！雖然話人人條路都唔同，不過Eliza嘅幸福反而令我酸溜溜。
最近兩晚都失眠，今晚連飲奶、數綿羊都唔得，於是索性爬起身上網。ICQ見到表妹Sabrina，佢知我失眠，就教我一個方法：平日呼吸都係吸氣短呼氣長，但係如果想快啲瞓着，只要相反「吸氣長、呼氣短」咁做就會有效。既然係咁，一陣間一於試吓先。臨Offline前，Sabrina見我唔係好開心，就約我今個星期六上佢屋企煮嘢食、傾吓偈，我應承咗佢。
上咗床之後，我一路用「吸氣長、呼氣短」方法呼吸，一路諗星期六買咩上佢屋企，點知唔使五分鐘，未諗到就瞓着咗！（六）