讀者AWong繼續來電郵指教「acronym」之事，佢話Amex（即AmericanExpress之縮寫）乃係「syllabicabbreviation」，另外一個例子就係Interpol（InternationalPolice，國際警察，但Interpol本身已變成一個英文字）。
讀者Ａ又講到UBS，話唔係一個縮寫，又唔係acronym，而係兩間銀行合併之後，特登揀一個冇意思嘅名字，以示對兩間銀行的員工公平對待，故此UBS不可與IBM、KFC呢類名字比較。
話雖如此，做慣銀行之人，一睇UBS就諗起UnionBankofSwitzerland（舊稱瑞士聯合銀行），唔會諗起同佢合併之SBC（SwissBankingCorp，舊稱瑞士銀行），故此UBS呢個新名字，對瑞士聯合銀行更加公平多一啲。打電話畀UBS一位老友記，問佢UBS是否縮寫，佢話：「好難界定。我哋與SBC合併嗰陣，本來想用一個名字叫做UnitedBankofSwitzerland，點知有一間小型銀行就係用呢個名，該銀行堅決不肯讓步，談判之下，佢哋開出一個高價，唔畀就冇得傾。梗係傾唔成啦，於是我哋索性將間銀行名稱註冊為UBS，打造新品牌，但你唔可以話UBS即係UnionBankofSwitzerland喎。」
一個名稱，價值連城。時至今日，見到UBS就想起瑞士銀行，見到Apple就諗起iPod，或者張報紙，隔幾秒先省起apple係好食嘅生果。先幾日有一位朋友話要創造一個著名品牌，唔想間工廠成日造OEM產品，佢問左丁山有乜好意見。唉，講出嚟就嚇親佢，話要再諗吓先。打造世界知名名牌，第一要有決心，第二要有銀紙，第三要假以時日。決心用於研究開發及製造高品質、精美輕巧便利靈活設計（例子：iPodnano），呢個決心要用好多個億，持久作戰十年八年不為功；推出新品牌產品要大力宣傳推廣，搞贊助，公關活動層出不窮，用錢又係數以億元計。用唔夠一億港紙就想品牌成名？冇咁易。