近排啲議員駕車要小心啲，由煲呔率領嘅珠三角考察團今日擇吉出發，原來出發前夕，馬丁差啲出事。馬丁周四晚揸住駕車喺中環花園道行駛，點知同部的士碰撞，差人哥哥到場，馬丁雖然係尊貴議員，一樣要接受吹波波測試，結果去食飯遲大到，兼要捱夜錄口供。
馬丁今次再踏足神州大地，佢當然好興奮，原來佢本回鄉證係八二年七月二十三日簽發，十年有效期，即係九二年已到期，𠵱家大多數人都換咗回鄉卡，佢本回鄉證都就快變歷史文物，證上有馬丁後生時個樣，大家睇吓認唔認得。
馬丁個證最後一次嘅蓋印，係八九年一月十五日，當時佢喺廣州開完草委會，估唔到一別就十六年，足足六千日有多，真係悠長。馬丁話就話入到內地唔會有所禁忌，但係其實佢最知中共最鍾意偷聽，以前喺白天鵝都領教過，今次舊地重遊，科技已經一日千里，睇怕唔易俾佢發現啦。
爆料熱線：29290000、27860099
報料傳真：26239278
報料電郵：[email protected]