《冰河世紀》開始，20世紀霍士嘅電腦動畫，已叫人刮目相看，不再叫PIXAR或DREAMWORKS專美！剛在香港暑假檔上過畫嘅《露寶治的世界》，最新出咗3區DVD，聽碟舖老細講，係今個星期熱賣之DVD，再加埋有古巨基、DJ森美及少爺占等聲優演出，每個角色對白都極度搞笑抵死，令原本講英文嘅荷李活電影，突然變成地道港產片一樣，親切咗好多！
記者：陳國輝
故事發生喺機械人世界，由爛銅爛鐵嵌成嘅洛尼，自小就夢想當發明家。喺父母支持下，佢離鄉別井遠赴「露寶城」，造訪偉大發明家大焊。點知抵達後先發現大焊經已失蹤，而集團更被奸狡嘅拉柴所控制。洛尼並冇灰心，反而憑着個人才華闖出名堂，並結交到一班共患難好友。不過「露寶城」嘅舊式機械人卻要面對被毀滅嘅危機，洛尼於是與一眾好友合力拯救呢批機械人。
對答爆笑似港產片
呢齣電影最大賣點，就係有啱Feel嘅廣東話配音。究竟有幾特別？論卡士，有古巨基、森美、詹瑞文、少爺占以及Cookies等群星聲優演出，名氣已經超晒班；尤其森美聲演嘅阿凡，角色性格好似《史力加》裏面隻驢仔，對白夠晒抵死，唔講重以為自己睇緊港產片！好似佢會無厘頭彈出一句「想唔想知古巨基住喺邊呀？」；而喺圍毆場面中，佢又無端端講咗句「嗰邊嗰個矮仔企高啲！」。如果你睇過周爺齣《功夫》，應該會明白箇中意思?！
特別收錄內容豐富
講包裝，《ROBOTS》嘅設計都算幾精美！以一本筆記簿嚟做裝飾，重用咗透明磨砂面，睇得之餘重易於收藏；另外，揭開裏面有兩本書仔，一本介紹9月至12月將推出嘅DVD，另一本則是《2005CATALOG》，今年內出過嘅電影都會一一羅列，霍士迷包保唔會Miss任何一套！
DVD裏面嘅Bonus同樣精采，除幾乎「必送」嘅未經刪剪片段及製作特輯外，最特別係附加咗兩款MiniGames，一款係必須利用遙控器數字鍵嚟操作嘅「機械人跳霹靂舞」動作遊戲；另一款就考記憶力，睇完畫面入面嘅特徵後，再回答問題，非常益智！
Profile
類型：3D動畫
級別：I
片長：91分鐘
DVDPro（23326326）
地址：旺角奶路臣街6E德發商場地庫B4舖