中秋過後，蟹迷特別興奮，等呀等，等呀等，終於到了食大閘蟹的時候！大閘蟹「粉絲」大致可以分兩派：落手派，即鍾意親自拆食蒸蟹，食後能用殼砌出原隻蟹形，更視為最高境界；懶人派，拆殼呢類粗重功夫，免得過就免，蹺埋手就有一啖啖蟹肉入口，超爽！今個蟹季，懶人派肯定可以食得好滿足，各式各樣的蟹粉菜熱辣上市，蒸炒煮炸、濃淡脆滑樣樣齊，唔會揀唔啱，最怕你食滯，不過，蟹食當前，點忍口呀？
記者：招佩珊
攝影：陳陶鈞、伍慶泉
食得豪部隊──蟹粉拼鮑翅
加入鮑參翅肚令菜式更顯矜貴，於是乎在蟹粉菜的餐牌內，少不了幾道「咁至食得豪」的菜式，傳統的有乾燒大排翅，驚喜新創作有焗鮑魚及炒翅。
至豪！金圈蟹粉炒魚翅 $450（a）
2両大青片翅，加入銀芽、蛋漿及蟹粉同炒，墊底是用上湯蒸煮的南瓜，淨食炒翅會有點膩，但伴以蒸得軟腍入味的南瓜一齊食，清甜的瓜肉減輕膩口感。
紙焗蟹粉鮑魚 $438（b）
剪開張牛油紙，隨即傳來陣陣葱香，奇就奇在一粒葱都唔見喎！原來，牛油紙已在用了大量葱炒過的油浸過夜，然後用牛油紙，將炒過的切粒南非鮑魚、日本本菇、蘑菇及蟹粉包成餃子狀，然後拿去焗，葱油的香味便滲進食材，當中以鮑魚最索味。
乾燒蟹粉大排翅 $480/位（c）
選用16寸大白青翅，浸發後以高湯燴20分鐘，食時淋上蟹粉，每位3両翅加1両蟹粉，一箸翅連蟹粉，翅身軟中帶彈又鮮味，食翅好似食麵咁一箸箸夾入口，食得豪，畀得更豪。
爽口部隊──入口啖啖蟹粉
舀一匙蟹粉放入口，「唔……」，甘香鮮甜，齒頰留香，忍不住一匙接一匙，食蟹粉最直接；或者好似鵝肝咁，以蟹粉伴以用樣香脆的餅食。
抵食！蟹粉銀絲卷 $120（b）
一份蟹粉用上2-3隻大閘蟹，以$120的價錢就食到，算抵食，不過，伴食的話就話叫銀絲卷，實情似多士多啲喎！
蟹粉扒戈粑 $188（c）
最普及的一道蟹粉菜，但大廚加入花雕炒蟹粉，難怪上桌時嗅到陣陣酒香。
大閘蟹粉脆餅 $168（b）
食法簡單，舀一匙蟹粉放在小口的脆餅上，一口一件，「咯、咯、咯」，脆卜卜的脆餅配蟹粉，好一道佐酒的餐前小吃。
土豆蟹粉焗蟹斗 $280（a）
薯茸焗蟹蓋的中式版，蟹蓋內釀入蟹粉、洋葱粒及寧波特產——夜香花的瓜絲，旁邊擠上薯茸，蟹粉焗過面層微脆，爽口的洋葱粒及瓜絲香口，食落唔算膩，攝影師連食3個都面不改容。
清淡部隊──配魚肉拼香滑蛋白
大閘蟹蟹粉頗油膩，淨食會好漏，於是，大廚們想出以清淡的材料如魚肉、蛋白或粉皮等，配以濃味的蟹粉，一濃一淡，中和蟹粉的油膩感。
多種食味
龍鳳蟹粉卷 $188（b）
做法類似順德魚卷，將東星斑拆肉，連同蛋漿煎成塊狀，捲成蛋卷狀再切件，再鋪上蟹粉；蟹粉鮮甜、蛋香濃、魚肉嫩滑，一件魚卷3重食味。
雪地金箝 $380（a）
底層是蒸蛋白，上面鋪了一打蟹箝，然後再鋪多層蟹粉，最後淋上湯芡；滑嘟嘟的蛋白配鮮味的蟹粉已是絕配，一啖「雪」落肚好正，家陣要加多幾錢力𡁻蟹肉，又肉又蟹粉好滿足囉！
蟹粉百葉包 $160（f）
賣相與百葉卷無異，但豬肉餡加入蟹粉，連同上湯一起蒸煮，百葉索盡上湯好入味，肉餡亦沾上蟹粉的鮮甜。
蟹粉蘆薈炒蛋白 $198（e）
靈感來自賽螃蟹，炒蛋白鋪上蘆薈肉及蟹粉，加上蘆薈肉蛋白入口清甜，既增加口感，又可中和蟹粉的膩口感！
拆骨部隊──蟹箝腳拆肉炒
蟹粉主要拆自蟹身，箝及腳通常被棄之，但若然用的蟹有6両以上，箝及腳都好有肉，於是，大廚物盡其用，將拆得完整的蟹箝肉及蟹腳肉來做菜，真正啖啖肉。
陽澄碧綠春 $180（a）
陽澄代表大閘蟹的蟹腳肉，碧綠春是指蘭度，加入薑葱清炒，食的是蟹肉的鮮甜。
惹味部隊──煎炸小吃夠香口
蟹粉唔一定只用來做大盤，加進一些小吃內，唔會太飽肚但亦可品嘗到蟹粉的陣陣甘香鮮甜，尤其是細細件又香口的煎炸食物，引得你食多一、兩件都唔怕膩。
黃金蟹粉炸墨丸 $68（d）
手打墨丸有蟹粉作餡料，外層炸得香脆，中層墨丸好彈牙，內層的蟹粉就夠鮮味，食味好有層次感，趁熱食惹味香口，但小心燙傷嘴唇。
蟹粉韭菜盒 $180（f）
類似煎韭菜餡餅，但麵皮搓得相當薄，煎得香脆一咬即破，唔似其他皮厚餡少的餡餅塞到你好飽滯，蟹粉鮮甜混合陣陣韭菜香，食一件絕對唔夠喉。
（a）東來順（27332020）
尖東麼地道69號帝苑酒店B2
（b）海景軒（27312883）
尖東麼地道70號海景嘉福酒店B2
（c）霞飛路（28826001）
銅鑼灣京士頓街9-11號地下
（d）德米創作料理（29891122）
尖沙嘴堪富利士道12號地庫
備註：跑馬地店同時供應
（e）桃李中菜廳（23134225）
尖東麼地道72號香港日航酒店2樓
（f）滬江飯店（25061018）
銅鑼灣時代廣場食通天13樓
備註：尖沙嘴店同時供應
