何超儀雖然貴為賭王何鴻燊的千金，但她一直希望憑自己實力殺出一條血路，不過賭王得知女兒想拍無綫劇集時，仍落力以暹羅橙意圖打動邵逸夫（六叔），可惜只得到一箱桃作回禮。
應屆亞太影展將於本周三（二十八日）在吉隆坡揭幕，何超儀主演的電影《蝴蝶》亦有份代表香港出戰，她並會問鼎亞太影后寶座。其實超儀過往已先後憑電影《地久天長》及《豪情》奪得兩個「最佳女配角」獎，今次若能成為亞太影后，她表示一生可算無憾。
亞太影展
賭王睇好愛女摘后冠
超儀昨日接受本報記者訪問時，透露日前與賭王父親何鴻燊吃飯時，對方問到她亞太影展何時會揭曉結果，又鼓勵她說：「你贏梗！」超儀笑言今次參選對手有《頭文字D》和《新警察故事》兩片，《蝴蝶》肯定被視為黑馬，但其父愛女情切，仍然望女兒捧獎而回。
出道十三年的超儀坦言渴望能一嘗影后滋味，家人亦十分關心其事業，特別是賭王父親，令她感到十分心甜。
超儀說：「幾年前爹哋知道我想拍TVB劇，佢話會同六叔（無綫行政主席邵逸夫）講，後來我先知，原來爹哋送咗一箱暹羅橙畀六叔，諗住六叔會打番電話畀佢，點知六叔冇嚟電話，但就送番一箱桃嚟回禮，之後爹哋同我講：『阿女，冇辦法啦！爹哋都幫你唔到。』」
難捨事業
老父丈夫催促生BB
超儀續說：「其實我係想靠自己實力去做好每一份工作，並唔係要靠裙帶關係去取得工作，而事實上近年喺影壇可以殺出一條血路，我都係靠自己，不過爹哋日理萬機，咁多嘢要煩，佢重有心同我做呢啲嘢，點會唔感動？」
除了父親外，超儀也從菲傭口中得知母親藍瓊纓同樣關心其事業，她說：「平時媽咪一向好cool，對我啲工作好似好冷淡咁，但上次喺香港金像獎，我憑《豪情》提名『最佳女配角』，當晚頒獎禮舉行時，原來媽咪一早喺度睇電視，見到我贏咗，開心到成個人跳起，爹哋同媽咪一直唔贊成我入娛樂圈，所以我以為佢哋唔會重視我嘅工作表現，我真係冇諗到原來自己完全估錯晒。」
賭王近日似乎很想抱孫，不時叮囑超儀不能只顧工作，給予家庭太少時間，建議她今次若奪得亞太影后，便應該是生孩子的時候。超儀說：「爹哋同老公都想我快啲生BB，但我覺得𠵱家唔係時候，最好係再過兩、三年先，因為我對事業重有一份鬥心，唔想咁易放棄，如果有咗BB，我冇可能集中精神工作。」
渴望改變
夥拍杜琪峰充滿期待
下月初超儀便會正式投入拍攝杜琪峰執導的新片《放逐》，她表示今次有機會與自己欣賞的導演合作，所以十分期待，早前她已與導演見過面，超儀笑說：「杜導演同我講，佢話拍戲嗰陣我會鬧人，叫我唔好介意，咁當時我就問導演，咁俾你鬧之餘，到時我可唔可以問你嘢，佢話睇吓聽唔聽得入耳。我覺得佢係一個好導演，我真係希望今次合作可以令自己有唔同嘅改變。」
採訪：陳月媚
攝影：葉君海
場地提供：CasaNostre
