一間出入口公司，花費三千五百元，委託一家速遞公司，將一件大型貨辦送往美國客戶，但速遞公司職員只將貨件擺放在收件人門口，毋須任何人簽收，便當收件人已收件並離去，最後貨件遺失。出入口公司負責人向《蘋果》投訴速遞公司塞責，令他蒙受金錢、精神及商譽損失。
長沙灣荔枝角道一間出入口公司負責人關先生稱，其公司一直有委託香港聯合包裹運送服務公司（UPS），運送一些玩具貨辦到外國，早前委託該公司運送一件大型貨件到美國時出現失誤，令他蒙受損失。
「嗰件貨係木製玩具貨辦，有成四呎長、兩呎闊、一呎高，特別喺上海製造，使咗好多運費先運到嚟香港，之後再送去畀美國嘅客；我一直有用開UPS，就搵佢哋送，件貨嘅運費三千四百七十蚊，正常嚟講兩個工作日可以送到。」
追尋貨件費時半年
關先生說，貨辦寄出後，其美國客人屢次向他反映未收到貨件，他向UPS查詢，對方追查後仍無結果。
關先生稱，貨辦非常重要，花費了不少精神和心力才製作完成，就算UPS賠償，亦不能彌補，包括費用、公司失信於客戶的商譽損失，他曾給UPS半年時間找尋貨件，但結果令他更失望。
只能根據條款賠償
「UPS覆番封信畀我，話公司司機已經根據收件人嘅地點，將件貨擺喺收件人門口，𠵱家件貨已經遺失，佢哋只能夠根據條款賠償；我真係好激氣，畀成幾千蚊運件貨，原來佢哋唔使搵人簽收，求其放喺收件人門口就算數，嗰件唔係一封信，而係一大箱嘢，點可能當垃圾就咁擺喺度就走人？」
UPS委託奧美公關公司以書面回覆本報查詢解釋，UPS一貫服務宗旨，是因應客戶需要派送貨件，譬如在美國，為讓客戶在最短時間及以最方便方法接收貨件，UPS會選擇提供將貨件送在收件人門外的服務。舉例說，如收件人地址是一般住宅地址，早上派件時沒有人接收貨件，而該貨件並非貴重物品，速遞員經評估後，若認為置放地點安全，便會將貨件放在收件人門口。
否認涉及人為疏忽
UPS指出，該公司會因應不同個案作出評估及妥善的貨件運送安排，不認為此事中涉及人為疏忽，惟UPS一向尊重客戶意見，並願意因應客戶需要作出合理賠償，故已作出一些運費以外項目賠償，現正等待關先生答覆。
關先生對UPS的回覆極為不滿，「我幫襯佢哋同其他速遞公司咁多年，從來冇聽過將件貨放喺門口就走呢種做法，如果我知道佢會咁，我重會唔會用幾千蚊搵佢運啲咁重要嘅嘢？我𠵱家考慮循法律途徑解決件事。」
（○九二三○○一）
服務熱線
電話：29908288
傳真：23702192
電郵：[email protected]