剛獲李超人捐贈八千萬嘅直資名校聖保羅男女中學，今年踏入創校第九十周年，校方噚日起一連兩日搞校慶同樂日，除咗學生表演，最吸引都莫過於展出一本本鋪晒塵嘅同學錄！教統局局長李國章、人大代表譚惠珠、考評局主席顧爾言等猛人都係聖保羅嘅校友，所謂三歲定八十，八方睇完都覺得好笑。
譚惠珠係希特拉
成日喺議事堂同議員舌劍唇槍嘅阿瑟李，原來讀書時好百厭，同學錄以「古怪多端，上堂好作妙語，為班房內增加情趣不少」形容佢，最攞命係踢爆佢讀書時豔史多籮籮，阿瑟李噚日俾八方問起呢件舊事，就尷尷尬尬笑住話，自己讀書時好奀皮，所以好同情𠵱家啲老師。咁答非所問，唔知係咪怕畀老婆扭耳仔。
至於珠姐譚惠珠，原來有「希特拉」之稱，事關佢幾乎年年做班長，上堂好似成日監視同學咁，不過喺同學心目中，佢喺課室內雖然成日裝腔作勢，但喺課室外就笑容可掬。至於顧爾言當年就被讚口才好，重預測佢他日當能有成㖭。
爆料熱線：29290000、27860099
報料傳真：26239278
報料電郵：[email protected]
