泛海集團（129）跌近半年支持區，又係時候博反彈。泛海阿仔泛店（292），最近短短13個交易日，由最高位1.94元飛身狂插8成，最低見上星期五0.385元，泛店咁質法，唔多唔少拖累埋阿媽泛海下滑，但相信心理因素大過一切。反之泛店呢期插得深，遲早彈鋪甘，亦對泛海有牽動作用。
報載阿仔泛店今年上半年酒店業務理想，入住率超過9成，下半年傳統旺季重樂觀，利益由下而上，照計泛海嚟自泛店純利應比往年好。
再講，無論阿仔呢期玩緊邊種跳水花式都好，泛海應佔阿仔嘅資產值都係不變，而泛海最新NAV0.84元，現價（0.34元）相對NAV重講緊折讓近60%，資產墊底因素強烈，冇有好怕。最近半年，泛海橫行底約莫0.31元，泛海再挨近支持區，可以收集。
光國兜底價0.4元
光大國際（257）最近兩個月大致喺0.4元至0.475元上落，啱位落場，又講兩點：
第一，光國啱公布05年度中期（6月止）純利6200萬銀，增長38%，原有基建及物業投資繼續穩紮穩打，嚟自新拓展嘅環保業務，新增溢利1223萬銀，佔總溢利達兩成半水平，頭炮有板有眼。
第二，祖國貴為世界工廠，但係資源浪費及嚴重污染問題，環保業係有得諗。呢期光國全方位進軍環保業，包括沼氣發電、青島污水處理擴建、江蘇宜興市垃圾焚化發電項目，亦將陸續喺明年及後年投入服務，配合國情，分分鐘開出條新財路。Beforethat，光國環保業暫時業績數據未算多，策略係暫時短打，長線追蹤，呢期兜底價0.4元。
錢雋