梁朝偉昨日出席兒童癌病基金的籌款活動，他否認自己患有肝病，更表示近日忙於鍛鍊身體，為新片作準備。而對於鄭秀文在《長恨歌》中的演出，就表示如果換他來演也感到頭痕。
梁朝偉昨日於又一城出席護膚品牌Kiehl's的慈善公益活動，宣傳義賣護唇膏為兒童癌病基金籌款，並即場將一百萬港元支票交給癌病基金。
已戒煙五年
對於早前有傳言指偉仔得了肝病而戒煙戒酒，他回應說：「啲八卦新聞咁先有爆炸性，我戒煙已經有五年，至於酒就不嬲都唔戒，但當然會少啲飲，會適可而止。」
那麼健康方面是否有問題？偉仔即笑着反問說：「你係咪想我有事吖？唔好咁毒，人哋好哋哋話人哋有事。」
甚少出席首映活動的偉仔，日前罕有到《長恨歌》的首映禮，問他覺得鄭秀文演出怎樣？他說：「第一次能夠挑戰難度高嘅角色，表現得相當唔錯。」
那鄭秀文可有需要改善的地方？偉仔說：「我都有好多地方要改善，因為每個演員個個都有不足，我又唔係影評人，點鬼知，但只有自己睇完，先知道自己有乜嘢地方要改善，因為我唔知佢拍嗰時內心諗乜，呢個係自己先最清楚。」
問偉仔有否覺得鄭秀文演技進步，他說：「我同佢只係拍過一部電影，唔係太熟，但今次個角色好高難度，唔需要睇有冇進步，畀我做頭都痕埋。」不過日前顏福偉指如果角色改由章子怡飾演會較合適，偉仔反問：「我冇睇過章子怡做，點知呀？」
想再有突破
另外，偉仔透露近日忙於為電影《葉問傳》鍛煉身體，至於電影何時開拍，他笑說：「王家衛想冬天開，但我怕拉傷，加上我想有多啲時間準備，我叫佢畀多半年時間我，因為我想喺《2046》後再有突破演出畀大家，所以要好好休息調整成個人。」
採訪：馮美茵
攝影：陳志嵐
