做明星切忌未紅先驕，做貓就無所謂。貓本身已經唔多理人感受，呢隻同Fiona拍過《小黑與我》MV嘅白貓，踏咗半隻腳入娛樂圈，更加高竇！攝影哥哥叫極唔理，主人撩極唔玩，最後搞足大半日先係咁意表演幾下玩波絕技。兩隻白貓大妹、細妹又夠靚女又夠純，建議佢哋組一隊貓Twins冧盡全港麻甩貓，呀！大妹重有一樣嘢好有星味㗎，就係好憎記者，喂！我哋唔係狗仔隊！𠵱家明影你喎！
記者：馬慶武
攝影：伍慶泉
記者認衰先肯露兩手
講真，記者縱橫傳媒界三五七年，真係未試過咁受氣！受人氣，忍！受畜牲氣，點啃？但最後都好專業咁吞咗啖氣，向貓Twins講聲Sorry，至有以下ShowTime。
踩親貓尾 迴避鏡頭
Sorry事件簿，成件事係咁引起嘅：話說記者難得有機會接觸MV星貓，當然要乘機探討佢哋嘅內心世界。我明，鍾意貓嘅都係貪佢哋夠寸，難得好心情咪過嚟嗲吓你施捨吓你囉，好鬼矜貴㗎。不過呢兩隻貓唔只寸，亦唔只懶，重好鬼憎攝影師部相機個鏡頭，不斷迴避瘋狂走位，鏡頭跟唔切淨係捕捉到貓尾。記者推斷，大妹細妹係識聽人話嘅。攝影哥哥一入到嚟就同主人講：「兩隻貓塊臉都好污糟喎，不如抹吓佢先影相吖！」咁啱大妹細妹最憎就係被人抹臉，主人用盡全力抱實佢，佢就不斷拗腰典嚟典去，最終當然貓不敵人，受過委屈有啖氣吞唔落，深心不忿咪玩番你囉。應該因為咁，所以先咁唔合作啫，連主人都話：「佢哋平時好活潑㗎，跳嚟跳去，細妹重識踢波盤球㖭！𠵱家好似嬲咗成村人咁。」
𠱁足大半日終有表演睇
明白原因，惟有同佢哋講聲Sorry，再等佢哋大發慈悲原諒我哋。𠱁咗半日都唔肯玩，最後主人出絕招──餵零食！食完後兩隻嘢無咁嬲，開始玩波玩冷繩喇！大妹天生係踢波嘅材料，盤球、頂頭槌、扮龍門飛撲都完全無問題，而且比較聽話，肯俾人抱住四圍走；細妹就惡啲，抱吓都唔得之餘，重鍾意跳嚟跳去，玩冷繩玩到發脾氣。兩姊妹玩咗攝影師半日，表演咗十幾分鐘就見攰要唞唞。意興闌珊準備離開嘅時候，Fax機響起，兩姊妹最後表演埋收Fax當Encore，收完Fax，瞓覺，散場！
拍MV踏星途
貓Twins擁有摺耳貓血統但係唔摺耳，所以擺咗喺貓店3個月都無人吼。最後被一間上樓Cafe收養，開始佢哋嘅陪客生涯，為五斗米而折腰！幸而Fiona咁啱有首《小黑與我》歌詞提到白貓，又咁啱有「星探」上過呢間Cafe飲咖啡見過佢哋，大妹、細妹天生純潔嘅靚樣受到賞識，被邀請同Fiona拍MV，正式踏上佢哋嘅星途。可能你會問：「Fiona個MV得一隻白貓之嘛，佢哋咪要攝位搶鏡？」答案係唔使，因為細妹去到Studio掛住瞓覺，大妹無驚無險就成為咗MV第二女主角。
點搵白貓Twins
Frame
地址：銅鑼灣波斯富街83號波斯富大廈1樓F室
電話：34282331