其士集團噚日喺四季酒店慶祝成立三十五周年，主席周亦卿喺商界人面咁廣，當然有唔少猛人到場恭賀啦，好似工商及科技局局長曾俊華、業績會以外鮮有一齊出席嘅新地郭氏三兄弟、TVB揸弗人六叔六嬸、恒生柯大俠，同埋信置主席黃志祥等。
周博士同八方講，其士由七○年成立至今，可以有如此成就，佢認為成功秘訣係凡事按部就班，唔急進。佢重話做任何事，首先要對自己有要求，自己要幫自己製造機會，唔好吓吓只識得要求人哋點樣做。佢話𠵱家啲人，吓吓都要求政府點，咁就唔係咁好啦！
八方問周博士，有好多公司都鍾意喺周年紀念年派特別股息，其士又有冇咁諗呢？周博士話暫時冇咁諗，但係呢個諗法都幾好，佢會考慮吓喎。周博士重話，雖然佢哋早前買咗PacificCoffee，其士嘅業務仍以建築為主。
傳真︰2623-9278
電郵︰[email protected]