經紀陳品題的合富輝煌（733）業績好，有芬佬吼兼貨疏，噚日最高炒上2.325元，收2.30元，升12.19％，成交金額2415萬元。
經紀陳話，隻股雖然再創新高，但PE仍然唔算高，派息又OK，所以有芬佬買貨唔出奇。
另外，細價股又陸續出嚟活動，好似股權易手有一段時間的金龍船（318），公司即將改名做黃河實業，股價昨日抽上16.41％，收1.49元，成交亦較平日多咗，有534萬股，金額752萬元。
經紀陳話，聽講新大股東買呢隻股殼唔算貴，只係5400萬元，但家陣隻股市值竟然高達80億銀，雖然有人憧憬金龍船改名後將會落實注資，但現時買入嘅風險認真唔細。
呢個論點令小初諗起泛海酒店（292），隻股冇幾耐前重企喺1.94元，當時公司市值計落成80幾億銀，家陣日日係咁跌，昨日再跌5.95％，收0.395元。小初知道近排好多人以為股價跌咗咁多，可以博反彈，但原來低處未算低。
慕容小初