世界職業球員共三萬八千人，投票選出巴西球員朗拿甸奴為最佳球員，相信冇人反對，朗拿甸奴技術好，球場上經常面帶天真笑容，隨時踢出森巴舞步式足球，可謂娛人娛己，連佢啲對手都要讚嘆。
另外，世界眾多球員又投票選出一隊夢幻球隊（DreamTeam），陣容如下（以四四二陣式排列）：
守門：迪達（巴西，AC米蘭）。
後衞：加富（巴西，AC米蘭）、尼斯達（意大利，AC）、泰利（英格蘭，車路士）、馬甸尼（意大利，AC）。
中場：朗拿甸奴（巴西，巴塞隆拿）、馬基利（法國，車路士）、林柏特（英格蘭，車路士）、施丹（法國，皇馬）。
前鋒：伊度奧（喀麥隆，巴塞）、舒夫真高（烏克蘭，AC）。
十一位最佳球員之中：意大利佔二人、法國二人、巴西三人、英格蘭二人、喀麥隆一人、烏克蘭一人。以球會計，由AC米蘭、車路士、巴塞隆拿、皇馬共四隊包辦。
各位認為如何？著名球評家RobHughes為呢隊波估價，值五億美元，車路士班主有資格寫張支票買晒。之不過，球員選球員，不免會有尊重尊敬與感情成份，例如後衞之中，尼斯達與馬甸尼已超過三十五歲，欠缺速度，施丹傷後未復舊觀，加富亦係年紀大，伊度奧未必係最好，如果由你選多一次，你會選邊位球員呢？
左丁山選另一隊（Ｂ隊），與上述ATeam砌過，相信賽事十分可觀：守門施治（車路士）；後衞：沙加度（皇馬）、盧斯奧（拜仁）、蘇金寶（阿仙奴）、高爾（阿仙奴）；中場：波力克（拜仁）、韋拉（祖雲達斯）、卡卡（AC米蘭）、尼華特（Nedved）（祖雲達斯）；前鋒：亨利（阿仙奴）、阿祖安奴（國際米蘭）。
Ａ隊對Ｂ隊，應該殺到難分難解，左丁山認為Ｂ隊更當打，可贏一比○或者二比一。以亨利、阿祖安奴嘅速度，Ａ隊嘅高齡後衞好難阻止佢哋入球。