馮仁昭四圍超：
韓君婷孖公仔醉賀壽星陳小韻

前晚陳小韻喺中環喜喜Club邀請咗一班好朋友慶祝生日，凌晨一點幾就見到張國榮生前助手Kenneth離開，不過佢一見記者上前影相就好避忌，不時用手遮住塊面，問到佢係咪祝賀陳小韻時，佢冇回答就走咗去。之後兩點鐘韓君婷又再次不避嫌同佢個同性密友陳早茵一齊離開，韓君婷好明顯飲到面紅耳赤，佢話自己送咗個香吻畀壽星女。可能韓君婷有少少醉，所以行樓梯時都要由身邊嘅女性朋友扶住，至於陳早茵就一馬當先行喺前面，佢見到記者影相時都面露笑容。

怕再次走光

直至四點幾，壽星女陳小韻終於盡興離開，旁邊有十幾個朋友陪住佢，當晚着咗一條超短牛仔裙配長靴。陳小韻可能飲到醉醉哋，落樓梯時都要朋友扶住，唔知係咪之前一晚行騷時春光乍洩重有陰影，加上佢條裙太短，佢為怕走光一路行一路掩住條裙。問到佢收到啲乜嘢生日禮物時，佢就話自己未拆過啲禮物，所以都未知。