證監會主席沈聯濤噚日最後一日返工，晚上員工同佢搞咗個歡送晚會，筵開三十席，政府都有派代表出席，財經事務及庫務局局長馬時亨雖然冇坐低食飯，但都有到一到，話要多謝沈主席七年來嘅貢獻。
沈主席噚晚對員工發表臨別演說，都不忘用近期嘅熱門話題自嘲一番。佢將自己自比窩輪，而同窩輪掛鈎嘅正股就係大市，如果大市好，隻窩輪未必同樣表現好，但係大市唔好，隻窩輪就肯定受壓，而窩輪係有時間值同到期日，佢自己就係末日輪，喺噚日到期。
雖然冇得留低，但係沈主席嘅家鄉似乎幾歡迎佢，上個禮拜馬來西亞沙巴州話會頒個拿督銜頭俾佢，過多幾個月沈主席重會返去馬來西亞大學教書。
主席離去，但政府似乎慢半拍，雖然市場已盛傳由證監執行董事韋奕禮接任，但政府重未宣布。
傳真︰2623-9278
電郵︰[email protected]