每次蘋果電腦有新機出，都會震撼影音界，今次部iPodnano主打力谷瘦身，以超薄7mm機身殺入AV場，加上已內置2/4GB記憶體，立即將巿面輕巧型MP3趕埋一邊，據知現在嘅出機行情，係市面上嘅貨已經賣得七七八八，當中黑機最搶手，已經好難搵，今日帶大家去時代廣場呢個潮人集散地，睇吓香港nano迷點玩轉呢部新機。
記者：許福合
攝影：林栢鈞
nano玩家心聲
自製臂帶兼iPod手機
Carmy原來好鍾意運動，跑步時都音樂不離身，所以專登搵咗塊靚靚布，可以將nano固定喺手臂上，方便聽歌，又可以抹汗；不過筆者睇落似乎唔多穩陣，所以各位愛機人士不妨買nano專用Armband，又型仔又可校大細，最重要係唔怕發生nano出走事件先啦！另外，Sandy重有一個好正嘅諗頭，佢話nano咁薄身，所以再搵嚟一部薄身手機，將nano黐上去，就可以成為「首部」iPod手機喎！「其實原本都唔想DIY㗎！不過Mot記部iTunes手機實在太肉酸喇！我覺得用部nano黐落部手機度，真係重型過佢」，蘋果電腦不妨諗諗佢個idea！
DIY襯絕白色掛頸繩
拎住部nano出街，當然想Show出來威威，不過奇怪嘅係機身無掛頸位；「雖然Apple都有出，不過人人用嗰條，好似着制服咁」，Sandy好聰明地用手機嘅黏貼式頸繩扣，貼在機背，咁就乜嘢頸繩都可以用落部nano度！日日着唔同色嘅衫，都可以配襯番不同顏色嘅頸繩，不過講到佢嘅至愛，當然係呢條同白色nano襯絕嘅白色頸繩啦！至於nano嘅使用上，Sandy都無咩特別，只係用嚟聽吓歌，打開佢部nano一睇，原來佢係容祖兒Fans！
黑白買齊拆機轉字形
Rod係iPod發燒友，佢玩nano嘅深入程度，簡直非一般用家可比，首先nano黑白兩隻色買齊，問佢點解買咁多部？答案竟然係無電嘅時候可以替換喎！雖然nano以咁嘅規格算係平，不過買多部後備機又真係唔係人人都豪得起！此外Rod重大膽到玩拆機；佢重即場示範，睇佢用螺絲批篤幾篤，nano就即時分體，真係拆機專家！另外，Rod重報料原來網上有方法教人將nano內字體轉換，睇得唔順眼就可以自己轉花款！
棄舊買新急放Shuffle
Angus本身已經有部Shuffle，但見到nano都受唔住引誘，立即第一時間出機。1GBShuffle都要成千蚊，𠵱家nano賣$1,550，最重要係多咗個彩芒，加埋7mm超薄機身，馬上將Shuffle比下去，所以現正為舊機物色買家。「用咗nano幾日，發覺都幾提心吊膽，怕刮花個靚殼，一旦受損非常礙眼，所以要買埋個5色機套，加多層保護。」
超薄版彩芒PMP
Kitty話nano除咗聽歌外，最鍾意係佢個電子相簿功能；佢一般係將手機影落嚟嘅大作，經電腦傳入nano內，然後攞出嚟同朋友分享，「nano個芒睇相真係特別靚，又有SlideShow功能，好過拎住大大部嘅PMP！」。
iPodnano最新行程
炒價有望$1,800
iPodnano真係近期影音界焦點所在，無論真正嘅音樂迷，或者只係想擺擺款嘅潮人，都受唔住吸引力，都話要出番部，不過據路邊社消息透露，由於貨源唔多，賣清呢輪貨後，再等下批可能要等一段時間，𠵱家拍賣網上嘅nano已經開始有炒味，白機?2GB版到價位已在$1,690；據AV場Sales話，如果遲吓真係斷貨，有機會炒到$1,800或以上；至於黑機方面，就更加渴市，賣貴多$100（$1,900）都唔係冇可能！
iPodmini末日
nano一推出，最慘嘅可能係班mini用家，價錢相近，但無論外形到功能，似乎都將mini比下去，唔少網友都話如果好似買車、Hi-Fi咁有TradeIn就最好！
Profile
容量：2GB/4GB
顯示：1.5"
連接：USB
音樂格式：AAC、MP3、WAV、AIFF
圖像格式：JPEG、BMP、GIF、TIFF、PSD、PNG
連續播放：14小時
體積：89×40×7mm
重量：42g
$1,550（2GB）
$1,900（4GB）
