珠三角旅遊團明日起程，曾團長已經執齊行李，不過截至昨日為止，個團嘅人數都重未定實，因為特區政府旅行社只係收到五十八個議員報名。咦，乜唔係六十人一齊北上咩？哦，原來自由黨劉健儀要跟葉澍堃去歐洲考察物流，一定唔跟大隊；而潮州怒漢詹培忠就重環遊緊世界，今日至返到香港。雖然連日來游說佢延長旅程去埋深圳廣州嘅午夜電話不停響，但係金勞詹就話佢等緊嗰個電話重未到，所以重未決定。
馬丁已輸一餐飯
金勞詹去唔去珠三角，當然影響旅行團嘅和諧，但更大影響，係鯉魚門海鮮舖老闆嘅生意。一眾飽受孔雀石綠困擾嘅鯉魚門街坊，都好希望金勞詹可以順應人心，唔好再扭計，等佢哋可以炒多啲蝦拆多啲蟹。
促進鯉魚門生意
點解議員北上關海鮮生意事呢？話說禮拜二晚，李柱銘做東，在鯉魚門設盛筵請民主黨一眾兄弟，以及孫公、馬時亨、曾俊華、林D九、蔡瑩璧等高官食海鮮。馬丁呢一餐，係因為佢當日同班官輸賭，話領匯官司政府會輸，結果政府贏咗，佢惟有認輸請食飯。當晚大家食得好開心，馬時亨重自攜靚酒，大家一啖酒一啖魚之際，又再拗起上嚟。馬丁話收到好堅嘅料，金勞詹最後一定會隨隊北上；肥馬就係都拗頸，話詹怒漢素來講原則，佢話唔去就唔去，冇理由轉軚。唔知係咪飲大咗，肥馬竟然肯十賠一，同馬丁賭一餐，如果阿金勞明日真係肯歸隊去見張德江，佢就請大家食十餐海鮮！
肥馬局長本來就好疏爽，最近賣咗元氣壽司股份，聽講個價靚到不得了，可能因此特別豪氣，而且大氣候講和諧溝通，中央政府為咗統一呢班民主派，不惜犯險畀佢哋過深圳河。咁馬局長就算輸，都成就咗個旅行團，兼且大有藉口同班白鴿黨摸十次酒杯底，交吓心扮吓Friend，好好計啫。
所以，為咗玉成馬局長請客心願，為咗促進鯉魚門海鮮銷路，創造劏魚捉蝦工人就業機會，詹議員，你就應承煲呔，去廣州行一趟啦。
傳真︰2623-9278
電郵︰[email protected]