我愛吃麵包，早上也好，下午也好，每天要咬一口才滿足，一條長法包足夠我咬一日當三餐！你唔係麵包迷你唔會明，點解小麥、酵母、水及鹽加埋會有咁大吸引力。其實，麵包又點止係嚿麵糰咁簡單？最近巡麵包店時候，又俾我搜括一堆新口味，餡料五花八門已不在話下，單是瞄一下它們的得意造型，就已經忍唔住要出手兼出口！
記者：招佩珊
攝影：陳陶鈞
小飛象包$7（c）
包內吉士餡唔算多，正正是多多包少少甜，包面有杏仁薄片，多添幾分脆口及杏香。
龜包$7（c）
紅豆茸餡集中在龜身，可惜麵包唔夠鬆軟，包面有芝麻增加香口感。
八爪魚$9（a）
一個包兩個Look，只要將非洲土人倒轉來看，便成了八爪魚。
Cutie類朱古力粉土人
上星期尾，慣例到銅鑼灣某大超市的麵包部掃貨，途中發現simplybread開了新分店，發現眾多新款式，例如喺今年香港國際美食大獎中的得獎作鴛鴦三文魚、南瓜法包，另外，還有心形的香芒燕窩酥。當中以非洲土人最過癮，包如其名，撒上朱古力粉的麵包，造型似足非洲土人，倒轉來看卻變成一條八爪魚，Cute到爆！行多幾間麵包店，亦發現其他Cute版麵包，好似龜、象及豬，別以呢類麵包只係冧小朋友，午飯時段就見到兩個OL各自夾了個豬頭豬扒包。
變身！非洲土人$9（a）
既係非洲土人，反轉又係八爪魚。Cutie到爆的土人，烏卒卒面層是朱古力粉，肥面內是香軟的忌廉芝士，朱古力味加淡淡的芝士香，味道配搭創新。
聰明豬先生$13（a）
豬樣麵包夾住件肉質嫩滑的豬柳，難得可以食到個塊肉唔係「乾爭爭」的豬扒包。
超人麵包$5.5（b）
賣相似足卡通人物麵包超人，圓碌碌的麵包頭內是滿滿的紅豆茸餡，起沙得來有少少豆粒有咬口，唔覺甜漏。
食客有Say（simplybread）
多餡類多重口感
鴛鴦三文魚$15（a）
一個包有兩種味道的三文魚，面層有煙三文魚，內裏有三文魚醬，貴就貴在用料新鮮，食落零舍唔同，魚包中的極品！平時食開的吞拿魚包？No啦！
朱古力富士卷$9（d）
雙重朱古力享受，先是面層一條條的朱古力脆皮，內裏是味道香濃的朱古力醬，一淡一濃兩種食味，朱古力迷走唔甩。
紅綠燈$12（d）
紅、黃、綠3色分別代表士多啤梨味、芒果味及蜜瓜味，面層酥皮及內層吉士餡的味道，夾番麵包所屬的3種顏色，傳統菠蘿包的新變種。
香芒心窩$13（a）
心形的芒果吉士酥，外皮鬆化，面層的吉士香而不膩，加上有燕窩及金箔，滿足感攞晒分！
紅豆「之」花$13（a）
白色是椰子奶凍，再放上原粒紅豆粒，前者香滑，後者有咬口，好似甜品咁雪凍嚟食，又得喎！
蔬果類啖啖健康
南瓜法包$15（a）
食落唔覺有南瓜茸，原來南瓜早與麵粉混和。切開法包，香脆外皮下是淺啡色包肉，唔覺有南瓜味，反而有芳郁的香草味。
向日葵忌廉南瓜茸包$10（d）
只是外形似向日葵，實際餡料是混入忌廉的鮮製南瓜茸；最美味是逐片花瓣掰開，蘸點南瓜茸才放入口，味淡但鬆軟！
芝士野菜餡餅$16（e）
外皮是中東包，餡料是青、紅、黃椒粒、意大利青瓜粒、青豆及蘑菇等蔬菜，酸酸甜甜的茄汁夠醒胃，溶掉的芝士甚香濃！
乳酪芒果軟包$14（c）
直徑有近7吋長的大圓環，面層是有點如菠蘿包的酥皮，包內分布着不少芒果肉，包身鬆軟有淡淡的牛油香。
乳酪菠蘿軟包$14（c）
是乳酪芒果軟包的「姐妹」麵包，但餡料換上菠蘿肉，可惜菠蘿粒咬落似橡皮軟糖，沒有鮮果肉的口感。
炸物類夠香口
夏野菜咖喱炸包$14（e）
香口嘢肯定吸引，外層的粟米片炸到脆卜卜，咖喱雜菜餡料少少辣好惹味，明知油膩熱氣，照食無異，幸好是雜菜餡稍為叫健康少少，減低罪疚感。
炸咖啡冬甩$10（e）
咖啡味冬甩，內藏半溶的朱古力粒，味道好豐富的一款甜點，奈何有點膩，一個夠晒數。
炸甜番薯冬甩$6（e）
Size有如乒乓波，外層煙韌，內裏番薯茸香而不甜，一啖一個𡁻得過癮，至少吞兩個先夠喉，咁又$12，都幾肉赤。
（a）simplybread（28907651）
銅鑼灣波斯富街84-94號寶富大廈地下E舖
（b）Breadtalk（31682488）
奧海城二期地下G69號舖
（c）Donq（28318412）
銅鑼灣崇光百貨B2
（d）匠味工房（27361816）
尖沙嘴漢口道43-49A號地下5號舖
（e）LittleMermaidBakery（29177252）
銅鑼灣時代廣場地庫B1city'super