「世界華文傳媒與華夏文明傳播國際研討會」第一次喺香港舉行，聽晚喺陳啟宗嘅新樓盤「君臨天下」會所搞歡迎酒會，新聞學嘅活動有樓睇，都算新聞。問剛榮升做新聞與傳播學院院長蘇鑰機點解咁威，佢話因為有位籌委同陳啟宗相熟，搵到佢贊助，所以大家有機會「君臨天下」，開party兼欣賞維港夜景。
呢個研討會以往三屆會議都喺內地開，今次移師香港中文大學舉行，聽講全中國五十所大學，包括北大、清華、人民、復旦、浙大等等嘅新聞及傳播學嘅著名學者都會嚟，參加為期五日嘅研討會。話明係華文傳媒，當然唔少得台灣、海外同埋本地學者。
劉遵義校長相當重視呢個活動，不過佢噚日要去上海出席復旦大學創校一百周年紀念同佢外公于右任書畫展開幕禮，所以只好由署理校長楊綱凱負責接待賓客。
傳真︰2623-9278
電郵︰[email protected]