飲奶不如食乳酪（Yoghurt），因為乳酪係用奶經高溫消毒再冷卻，然後加入乳酸菌發酵而成，不但有奶嘅豐富營養，重有多種活性菌可被人體吸收。一般乳酪都係用牛奶發酵，但原來重有羊奶同埋豆奶乳酪俾你揀。
記者︰劉昱蘭
攝影︰陳偉強
Model︰Aries
羊奶vs豆奶vs牛奶
貴得有道理：極品羊奶
脂肪係最難被消化吸收嘅營養，而羊奶嘅脂肪球較牛奶細，腸胃容易啲吸收，老人家、體弱者同埋細路仔最啱食。另外，羊奶嘅營養價值更接近母乳。母乳有一種因子，係羊奶有而牛奶冇，對身體弱人士特別易吸收。用羊奶發酵成嘅乳酪，係乳酪中嘅極品。
加鹽唔加糖嘅羊奶乳酪好特別，無論食味及質感都似食緊芝士，所以未必個個人都吸收得到。
售價︰$50/300克
共兩杯（b）
夠健康：素食主義豆奶
若怕源自動物嘅牛奶膽固醇高，食黃豆製嘅豆奶乳酪就冇有怕。豆奶不含膽固醇，而且多半係不飽和脂肪。另外，食豆奶乳酪比飲豆奶更好，因為黃豆有不易被吸收嘅優良蛋白質，豆奶乳酪有乳酸菌幫手分解蛋白質，變得容易吸收。但喺豆奶中嘅鈣及維他命含量，則唔及牛奶豐富。
豆奶乳酪豆香濃，但冇乜甜味，不及牛奶乳酪咁滑溜。
售價︰$15/一杯170克（a）
最滑：天然牛奶
用日本乳牛嘅鮮奶製造，濃郁牛奶味，同加工過嘅奶粉乳酪冇得比，而且口感好似豆腐花咁滑溜。
售價︰$17/一杯120克（a）
生果以外
食果味乳酪食到悶，不如大膽試吓發掘其他口味啦。
酸咖啡
一入口就有好濃烈的咖啡味，完全唔覺係食緊乳酪。但當咖啡味一散，乳酪嘅酸味就慢慢滲出，真係好特別。
售價︰$16/一杯150克（a）
穀物粒粒
當你吞咗啖乳酪落肚時，重會有啲穀物粒粒留喺個口入面俾你𡁻吓。穀物由小麥、大麥、燕麥同黑麥4種混和而成。
售價︰$21.5/500克共4杯（d）
拖肥唔肥
拖肥味道香甜但易肥，唔緊要，呢杯係FatFree㗎！不過拖肥味就少得好可憐。
售價︰$45/
一杯450克（c）
甜味榛子
嗜甜嘅朋友，呢款榛子乳酪就啱晒你。食落香甜唔會酸，重有粒粒榛子好有口感。
售價︰$28/
一杯130克（a）
撈一番
酸甜兩極
呢款最啱想試正宗純味乳酪、但又驚唔啱食會成杯浪費嘅朋友，食唔慣可以撈勁多蜜糖，中和純乳酪嗰種超酸味道嘛。
售價︰$22.9/一杯150克（c）
有聲乳酪
食粟米片唔一定加奶，試吓加乳酪都好好味。呢款乳酪好甜好滑，奶味好重，少咗種酸味，好似食緊加咗奶的香甜粟米片一樣。
售價︰$23/一杯105克（a）
口感豐富
先吞一啖酸酸哋嘅乳酪，然後咬開甜美嘅朱古力豆，糖衣入面包住好似餅乾咁脆口嘅粒粒，口感勁豐富。
售價︰$21/一杯150克（a）
來一層合桃
喺一層純乳酪上面，鋪咗一層合桃，入面加咗少少蜜糖唔會太甜，撈埋嚟食都幾滋味。
售價︰$46/
一杯500克（b）
乳酪加乳酸菌有乜好？
乳酸菌能幫助保持骨骼強健及腸胃健康。乳酸既能與牛奶轉化為較易吸收的乳酸鈣，又能抑制腸內壞菌。
點解食牛奶乳酪唔會絞肚痛？
好多人飲牛奶會腹痛、腹瀉等，是因為牛奶中的乳糖作怪。而乳酪中的乳酸菌，則可將乳糖轉化為葡萄糖。改食乳酪，便可獲得與牛奶相同營養。
食得健康低脂低糖皆重要
為咗迎合客人口味，好多乳酪加咗唔少糖份，所以唔好淨係睇佢係唔係低脂，低糖都好重要。
售賣點︰
（a） city'super︰
中環國際金融中心商場1樓1041-1049號舖（22347128）
（b） Oliver's︰
中環太子大廈2樓201-205室（28107710）
（c） Taste︰
九龍塘又一城MTR層05號舖（22658698）
（d） 西田百貨超市︰
沙田新城市廣場3期3樓（26941111）