鄭希怡（Yumiko）、蔣雅文（Mandy）、李逸朗（Don）同關智斌（Kenny）前晚喺尖沙嘴一間酒吧宣傳某牌子啤酒，Yumiko以性感貓女造型出現，好鬼野性。
廣告商安排赤裸上身嘅男模上台，要Yumiko喺佢身上寫字，搞到Yumiko鬼死咁尷尬。點知後來重絕，一位着住露出假屁股孖烟囱嘅外籍猛男攞住支啤酒衝上台，黐埋Yumiko度跳舞，重扭嚟扭去。Yumiko起初愕晒然，後來就同佢大跳辣身舞，個男士重自摸下體，懷疑佢有生理反應㖭，搞到觀眾大叫「我又要」！猛男落台前重錫咗Yumiko一啖。
Mandy牛一
事後Yumiko話嗰晚嘅主題係釋放野性，又話初頭見到個外籍男士都幾驚，以為佢飲大咗，點知見工作人員冇反應，所以先唔怕。
另外，前晚踏入凌晨就係Mandy二十三歲生日，大家就同佢慶祝，又起哄要其緋聞男友阿Don錫壽星女，阿Don擾攘一輪最後拉埋Kenny一齊錫，Yumiko就同Mandy嘴對嘴。
