十．一未到，但慶祝國慶嘅酒會日日有，都唔記得邊個慶邊個。噚日輪到香港工商界婦女喺尖沙嘴洲際酒店開騷，請來特首夫人曾鮑笑薇同律政司司長梁愛詩做主禮嘉賓，認真有面子。
共產黨話婦女能頂半邊天，梗係冇人敢睇小啲女人啦。八方問曾太，會唔會做跟得夫人去珠三角？佢笑笑口冇答；當然佢唔會去，否則班尊貴議員就會話特首唔公道，自己帶老婆北上，但唔畀佢哋帶。
怕搞埋男人界學生界
活動籌委會主席費斐係人大代表，佢最近見過煲呔，佢話煲呔好尊重班人大，會面嘅時間比老董當年長，問佢係咪贊成加一席婦女界功能組別，佢馬上好認真咁話：「既然問到，明知會俾人鬧，都要講吓。」佢話雖然身為婦女，但都唔贊成搞個婦女界別，否則到時男人搞男人界，學生搞學生界，咪好唔得閒？況且費小姐覺得咁做有啲示人以弱，女人應該堂堂正正同男人喺所有界別爭出線，唔係要特別關照，自我邊沿化。
費小姐果然係名門之後，阿爸係《大公報》已故社長費彝民、前草委，個女講嘢都有板有眼。呢番言論，咁啱聽，八方諗煲呔一定錫晒佢，至於加五席區議會又點睇呢？費小姐話開初都唔支持，覺得唔得均衡參與，但後來諗真，政治都係妥協，既然區議員有一定代表性，就可以接受啦。
詩姐做政協常委唔易
照咁睇，煲呔同肥龍個政改草案睇嚟已經排除萬難，中央一定做咗唔少工夫，早前人大常委副秘書長何曄暉嚟過香港，話冇傾香港內政喎，不過另一位副秘書長喬曉陽嚟，就一定有傾政改啦，重幫手擺平人民內部矛盾。等煲呔同肥龍軟硬兼施，㩒住自由黨嚟打，同民建聯討價還價，再溝埋民主派，咁就大功告成。
政改五號報告書搞掂之日，恐怕就係詩姐姐走人之時，八方噚日喺酒會上問佢係咪會做政協常委？佢反應敏捷：「你想做就有得做，咁易咩？」八方梗係冇得做，但係詩姐姐過去八年為特區做咁多嘢，為老董同中央擋咗咁多箭，安慰獎都有個啩，聽聞中聯辦副主任鄒哲開退下，多咗個政協常委空缺，但係好多人爭，田少都想做，畀邊個就要爭到明年至知。
傳真︰2623-9278
電郵︰[email protected]