港股受外圍拖累，一度跌逾百點，但低位承接有力，尾市跌幅收窄，恒指收15179，跌43點。周二大升之後，連續兩日在外圍不利的影響下，調整幅度都只係咁輕微，相信整固完成後，真係有力衝破15509，再創今年新高。
大藍籌以和黃（013）最勁，午後一掃，就搶到上79.45元收市，大升0.90元，家吓走勢上又做緊旗形，圖表亦全面轉好，有可能在80元以下「牛」多一兩日，一破位而上，就可向84元的上升目標進發。滙控（005）收125.20元，跌0.70元，大行𠵱家擺到明係掃和黃同中移動（941），㩒滙控。中移動噚日低成35.85元，但尾市一段又掃得好急，結果高收36.50元，逆市而升1個位。中移動做旗已第2日，一衝破36.60元，升浪又會再起，目標指向39元。
中移動C輪前日升得急，噚日回一回氣，重好。睇好中移動，短炒買3637最實際，跟足正股起，目標0.90元。
金屬電子交易所（8161）表現對辦，噚日收2.30元，升5仙，近日升勢慢火煎魚，衝破前高位2.50元阻力，可望出現急升，基金家吓重係好積極咁收集，目標價會係4到5字頭。
股價折讓達58%
看好金交所，其實大股東嘅寶威控股（024）一樣有留意價值，起碼佢𠵱家股價偏低，未有充份反映揸住金交所嘅價值，日後嘅升幅可能比金交所更大。
金交所發行14.3億股，寶威持有3.8億股，佔26.84%；寶威發行股數10.5億股，即1股寶威持0.36股金交所，以金交所2.30元計，每股寶威已值0.83元。
寶威本身經營鋼鐵業務，淨值約0.70元，連同持金交所權益計，總數達1.53元，股價大折讓58%。
寶威去年由虧轉盈，今年表現理可再進一步。04年度（12月年結），寶威營業額41.2億元，盈利3458萬元，每股盈利3.28仙，03年則虧蝕8971萬元。
05年，金交所成功變身，寶威在8月出售8000萬股，作價1.29元，套現淨額約9200萬元，可令全年盈利急升。
8月初，寶威由0.45元起步，升上0.67元，近個多月走勢形成大型上升三角形，若升破0.69元阻力，上升目標係0.92元。寶威下周一（26日）宣布中期業績，若有好消息，股價可破位而上。
郭兆誠