有線將增加新知台國際頻道，年底會於香港、北京和廣州舉行大型招募活動，約請六十人，採訪要識兩文三語，主播除了報道新聞和主持娛樂資訊節目外，還有機會演出驕陽電影公司旗下電影。
有線衛視新知台至今已可於內地、馬來西亞、北美和南美等地收看，因為做出成績，所以有線將會增多一條有線新知台國際頻道，並會於年底在香港、北京和廣州舉行大型招募活動，台前幕後聘請約六十人。
吸納廣東話觀眾
有線電視節目部執行董事徐小明日前接受本報訪問時說：「因為本來已經有新知台，所以唔使好似開一條新台咁請好多人。新知國際嘅目標觀眾主要係東南亞同香港，將會有新聞報道同埋娛樂資訊節目，所有嘅節目都係以廣東話為主，因為東南亞已經有好多國語頻道，但廣東話嘅頻道就少之又少，我哋覺得好有巿場。」
徐小明續說：「至於喺內地請人，因為部份節目參考內地嘅模式。香港有好多新移民，佢哋亦係我哋嘅目標，而且有好多採訪都會喺內地做，識國語同英文都會大派用場。」
新知國際頻道的主持不但報道新聞和娛樂新聞，更有機會接拍有線旗下驕陽電影公司的電影，徐小明說：「電影方面需要好多新血，我哋會發掘一啲有演戲潛質嘅主播拍電影，公司想力捧一啲新人出嚟，相信好多年輕人對呢啲挑戰有興趣。」
與國家電台合作
此外，早前有線電視與中國國際廣播電台達成協議，有線多條頻道可以收聽該台製作的節目，此舉是香港傳播媒體首次獲邀與國家廣播電台合作，將國家電台節目帶給香港觀眾。徐小明說：「該台嘅節目正正係香港唔少操唔同方言嘅觀眾需要嘅，可以解決唔少人嘅思鄉情緒。」
採訪：張止寒
