數當今體壇睇得又打得嘅大美人肯定係俄羅斯嘅舒拉寶娃，難怪年僅十八歲嘅佢已經係網球界搵錢最多嘅一姐。不過佢未算威，著名高爾夫球壇美少女魏聖美，已經決定喺下月十一號十六歲生日前，正式轉做職業球手，到時呢位美籍韓裔靚女嘅收入好可能超過舒拉寶娃。
六呎一吋高嘅魏聖美，十三歲開始已經越級挑戰男子職業賽事，外界都認為佢將會成為女子高球壇嘅老虎仔活士，所以好多廣告商都爭住簽佢；據報以Nike為首嘅三間公司已經同意喺魏聖美轉打職業後立即簽約，估計單係廣告同出場費，魏聖美頭一年打職業賽嘅收入已經達到一千萬美金，即近七千八百萬港幣，肯定係運動史上最年輕嘅超級女富豪！