迪士尼樂園開幕，對旅遊業有幾大幫助，睇最近一間酒店管理公司就知，公司擴充，喺灣仔嘅寫字樓唔夠用，升級租入全港租金最貴商廈之一嘅國際金融中心一期，估計租金升幅以數倍計。
促成呢單租務嘅萊坊話，間公司業務擴張，寫字樓唔夠用，剛以市值租金，承租國金一期三千呎，比起現有寫字樓大三倍，租期三年。
國金一期出租單位唔多，租金海鮮價，海景單位動輒要七八十蚊呎，租客一般係金融業相關機構，旅遊業唔係咁多。
灣仔最高租值嘅太古廣場三期，𠵱家呎租都係叫緊四十蚊左右，間酒店管理公司租開嘅灣仔寫字樓，如果兩年前租，租金可能只係十幾二十蚊，今次租大咗幾倍，呎租又貴幾倍，你話幾豪，不過唔知入面嘅員工，人工升幅能唔能夠同租金升幅掛鈎呢？