個市昨日大漲小回，恒指由最多跌79點變為跌18點，收報15223，國指由最多跌52點變為跌20點，收報5100。個市如果直線上升，買C輪會買得心驚驚，買P輪又好多人唔夠膽。有上有落，先至襟玩。估計短期內仍係上落市，有平貨則買C輪。
國壽C輪4702：國壽（2628）連續5日，都係收6.15元，夠晒穩定。由上月15日至今，都係喺6.15元上下反覆。
1隻芬佬睇住嘅國企，唔可能長期牛皮，最終都會突破，估計向上多過向下，係時候收啲C輪，等正股破位帶來利潤。
國壽C輪正路之選，係4702，明年1月尾到期，輪價41仙，溢價5.9%，槓桿率15倍（有效8.7倍），引伸波幅25.3%。同係1月到期嘅9181亦唔錯，交投則冇4702活躍，一日走幾轉，仍以4702為宜。
恒地C輪4593：恒地（012）喺大隻地產股中最硬淨，收38.80元，進帳45仙。C輪3609升18%，高溢價，大槓桿率。要博恒地C輪，不如揀隻4593，明年1月中到期，輪價28.5仙，溢價2.4%，槓桿率13.6倍（有效9.1倍），引伸波幅22.2%。交投唔多，冇法子，一向如此。
章盛