港股前日大升，噚日調整，好正常，但恒指僅回落18點，證明市底確係好強，若未來一兩日唔落得，則大市好明顯係到底回升，8月29日的低位14734同9月20日的14943，有機會形成高低腳的底部，現水平整固完成後，升破前高位15308，第一個目標係15509，第二個目標係15800。
大市焦點仍然係在中移動（941）同和黃（013）身上，前者收36.45元，跌0.1元；後者收78.55元，升0.1元。兩股後市都可看好，但和黃噚日一度搶上79.75元，升1.30元後又大幅回落，80元以下的沽壓，相信要消化多一段時間；至於中移動，急升之後整固，形成旗形，短期好快會再向高位推進。中移動今次由34.35元起步，急升上36.75元，噚日消化，但仍能高收，相信好快又會破位而上，以量度升幅計，目標係39元。
8月下旬推介過中移動，當時股價35元，理由係「中移動已唔再單止係公用股，而同時亦係增長股，具備數據服務高速發展的優勢，快速發展的公司，自然會獲得較高的市場評價」。
有能力進行大型收購
中移動8月份再傳喜訊，繼7月份新增358萬戶後，又再增加364萬戶，創出逾兩年的單月新高，令用戶總數上升到2.31億戶；其對手聯通（762）則由於CDMA上客量持續下降，8月份新增客量只有120萬戶，較7月份減少4.6%。
中移動成功鞏固內地市場的優勢後，開始在海外物色投資機會，目標地區包括印度、巴基斯坦、也門及烏茲別克。中移動上半年獲利240億元人民幣，升28%。自由現金流動強勁，持現金結餘517億元人民幣，有能力在海外進行大型收購。
看好中移動，短線可吼C輪3637，有半個月時間，正股升上39元，3637坐硬有0.90元，預期升幅接近30%。呢隻輪成交大，轉身容易，短炒最有利。
半個月前，推介TOM在線（8282），當時股價1.44元，到噚日卒之發力，搶上1.71元高收，大升15.5%。網上遊戲股在外國被熱捧，TOM在線亦成為尋寶對象，暫時仍可以上移止賺位繼續持有，目標價1.90元。
郭兆誠