電影《長恨歌》前晚舉行首映禮，台前幕後工作人員其後齊到酒吧消遣，但「白花油王子」顏福偉卻醉酒大鬧現場，除大聲呼喝鄭秀文（Sammi）不准吸煙外，又指章子怡做女主角會比鄭秀文好，更直指「套戲死就死喺Sammi手上」，昨日顏福偉在電話中說：「咁我係觀眾，都係表達我自己嘅意見啫。」
由鄭秀文主演的電影《長恨歌》前晚舉行首映後，導演關錦鵬、美指張叔平、鄭秀文、胡軍、吳彥祖和女友Lisa.S、陳自強、毛舜筠和老公等一行約三十人，齊到跑馬地紅酒館飲酒聊天，同場還有Sammi的前助手阿爽、曾與Sammi傳緋聞的阿爽家姐Serena及「百花油王子」顏福偉等。
轉口風
女主角到場即讚靚
Sammi昨日凌晨約十二時出席首映禮後，先載經理人郭啟華到紅酒館，然後驅車返回大坑大寶閣寓所，約一時十五分Sammi換上一件白色衫再獨自折返紅酒館。據現場消息透露，Sammi未到達前顏福偉已在酒吧內頻頻發表「偉論」，指「套戲死就死喺Sammi手上」，又指她國語差，應找章子怡做女主角，令關錦鵬和張叔平十分不悅。
Sammi到場後，顏福偉即轉口風說：「女主角嚟啦，女主角好靚呀！」而當Sammi與Serena擁抱錫面打招呼時，顏福偉即在旁說：「哦，你兩個攬住搞les（編按：顏福偉應指lesbian，即女同性戀），舊情……」張叔平即對顏福偉說：「你講乜嘢呀？講嘢小心啲，係咪想冇晒朋友呀？」
其後當Sammi抽煙時，顏福偉又大聲喝Sammi：「唔好食煙呀！」甚至出手拉扯Sammi，張叔平因看不過眼對顏福偉說：「你扯呀，呢度冇人歡迎你，菠蘿雞（意指靠黐）！」不過顏福偉並沒有因此離開，凌晨約三時阿爽硬拉着顏福偉離開，但轉頭他又拿着幾罐啤酒出現在酒吧內。Sammi則於凌晨約四時十五分在郭啟華陪同下離開，當她在酒吧門口見到記者即面露笑容，只見她扶住門邊，明顯帶醉意。
斥討厭
「針對人唔係咁好」
記者昨日就事件致電關錦鵬，他在電話中回應說：「顏福偉？你講白花油呀？我識佢，佢有嚟到，但你講嘅事我真係睇唔到。」提到顏福偉令張叔平十分生氣，關錦鵬說：「可能佢飲醉酒啦，每個人都有鍾意同唔鍾意嘅人，但佢咁針對性對人就唔係咁好，係令人幾討厭嘅事。」
而顏福偉昨日則否認有講過「套戲死就死喺Sammi手上」，他在電話中說：「我係醉咗，飲咗好多，但記憶中冇咁講過，我係有講過話如果章子怡做會好啲，咁佢國語好，又喺內地，咁我係觀眾，都係表達我自己嘅意見啫，你問我我都會直接講㗎。」
反吸煙
指Sammi哮喘應戒煙
顏福偉續說：「我重記得我學Sammi趴喺地下撼頭埋牆嗰一幕，當時撞落Sammi個杯度，佢重問我有冇事，我冇扯佢，但的確有大聲叫佢唔好食煙，我係咁講嘅：『你身體唔好又哮喘重食煙』，我有叫佢唔准食煙，套戲入面個個男演員都食煙，使唔使呀，梁家輝食、胡軍食，重好似好型咁，喺呢樣嘢嚟講Idon'tlikethisfilm（我唔鍾意呢齣戲）！亦唔鼓勵人去睇，我係反吸煙者，唔鍾意好正常。」
問顏福偉與Sammi是否相熟時，他說：「唔熟㗎，但我識咗佢好多年，佢十六歲喺華星已經識佢，睇住佢大。」提到張叔平趕他離開酒吧一事時，顏福偉說：「我完全聽唔到，其實我同佢哋全部唔熟，係阿爽同Serena叫我去，我都唔知去邊同埋做乜㗎，咁我只係講我嘅意見出嚟，又冇喺公眾onair咁講，我有讚阿叔㗎，佢知㗎，但你叫我話套戲verygood、一百分我又講唔出口，好似有啲人覺得白花油好臭，唔鍾意唔會監人㗎嘛，好似你唔鍾意我唱歌咁，你咪轉台囉。總之我冇惡意嘅，無論點關錦鵬都係我非常欣賞嘅導演之一。」
採訪：張止寒
攝影：娛樂突發組
