如果重用緊讀卡器或者USB傳輸線抄相落PC，恐怕冇幾耐之後，就俾人話你Out！皆因Nikon最新P系列，已經推出咗全球首部內置Wi-Fi嘅數碼相機──P2及P1。憑藉其IEEE802.11b/g制式，在30米的範圍內，你可以將剛影完嘅相，喺唔駁線情況下，直接以無線網絡上傳至電腦；而只要Printer對應Wi-Fi，無線打印相片都重得！
記者：陳國輝
攝影：陳盛臣
ImageGirl：Cody
Nikon最近連氣公布5部新DC，全屬入門及中階消費級。當中最矚目者，首選全新P1及P2！因為佢哋係全球首部內置Wi-Fi數碼相機，不過唯一敗筆，係機身設計同舊款消費級DC完全一樣，齋睇樣真係估唔到佢哋咁強。為咗完善整個系統，Nikon亦打算推出內置Wi-Fi打印機––PD-10，記者會上暫未有實物，相信離推出日期重有一段時間，令人好期待！
10秒連上電腦
全新P1及P2，係全球首部內置Wi-Fi民用級數碼相機。兩機規格大致相若，不同處係P1（$3,380）屬高階型號，所以使用了800萬像素CCD、ED靚鏡及內置32MB記憶體；P2（$2,880）就屬於比較「慳家」嘅入門初階DC，起用510萬像素CCD同內置16MB記憶體，不過機價相差$500，如果平時只作SnapShot遊玩性質，當然以P2較抵玩！想將P1、P2經Wi-Fi駁電腦，第一部就係要同部腦安裝軟件，跟機有一套《PictureProject1.6》，介面清楚StepByStep，大概20-25分鐘就搞掂；自此之後，只要相機一校去Wi-FiMode就會認到電腦，唔使又掹卡、又插USB就可以傳相入電腦，的確好方便！至於實地測試感覺，係一切都好快速；基本連結上電腦約需10秒，至於上傳一張500或800萬像的相片，大概所需時間都係2-3秒，感覺同平時用USB傳相差唔多，軟件設計都算相當成熟。
影人像特別耍家
P1及P2除咗以上所講的差別外，基本操作功能大致相若，CCD嘅成像能力，亦一如Nikon相機嘅傳統，夠晒滑淨，兩機同備3.5倍光學變焦鏡頭，實質焦距為36mm至126mm，感覺尚有改善空間！不過最正是加入了Nikon獨門嘅D-Lighting自動曝光，雖然機仔細細，不過測光感覺特別準，對於入門用家嚟講，當然係簡單易用兼影到靚相啦！至於人氣之機S1嘅成名絕技－－面部優先自動對焦功能，今次P1同P2都有加入，影人像時吓吓自動追住塊面嚟影，咁就更加包清包靚啦！至於儲存媒體，除咗內置記憶體外，為咗機身嘅纖巧實用性，使用了SD卡作儲存媒體，機背都係𠵱家最起碼的2.5"芒，細機大芒，特別適合大眾口味。
Wi-Fi種過相招式
所謂利用Wi-Fi過相，係咪逐張相Send完就算呢？原來成功連接之後，會出現一個「無線功能表」，重有幾種過相招式俾你揀㗎！
1﹒乜都Send晒
玩法非常簡單，就係將DC裏面所有相，包括內置記憶以及SD卡記憶，一次過Send晒入電腦，乜都唔使諗！
2﹒即拍即傳送
每影完一張相，就會立即自動傳送入電腦，絕對係「一條龍」式操作，不過每次傳相都會Hold住部機，都幾煩人！
3﹒以日期掟相
利用日期為分類，咁就可以將某一日嘅相片一次過Send入電腦，唔使喺部DC裏面搵嚟搵去咁麻煩！
4﹒精挑細選
最人手操作嘅辦法，就係經過逐張挑選後，再Send入電腦；雖然過程繁複，但對於冇特別分類嘅相，就只有咁做！
5﹒變身PC外置儲存器
當你揀「PCMode」，DC操作會暫停，而DC裏面嘅記憶體位置，就會好似一個無線式外置儲存器，出現於電腦之上。
600萬像DC三連發
嚟緊第四季，Nikon除咗有P系列大玩無線傳輸，重會分別加推三部600萬像素抵玩DC，有卡片機也有中階機種，好似想極力網羅不同層面的DC用家！
S410倍變焦重炮
睇見呢個扭擰機身，不期然令人想起極度經典的CoolPix990！到𠵱家新一代S4，機身換上一身銀色CyberLook，不過可惜者，全金屬機身不再，採用較輕身嘅膠機身；機身照樣可作270度扭動，攞鏡攞位一樣勁方便，最勁係支鏡頭，由上代CoolPix4500的4倍光學變焦，提升至10倍光學變焦，實質焦距有成38-380mm，細機重炮，份外難得！
Profile
感光元件：1/2.5”640萬像素CCD
顯示屏：2.5”LCD
儲存媒體：SD卡（內置13.5MB）
尺寸：111.5×68.5×37mm
重量：205g
S3三色機殼功能微升
S1推出都好似係年頭嘅事，嘭一聲又出S2，𠵱家再有部S3推出；機身設計都係差唔多，不過CCD感光元件就由500萬像素，微升至640萬像素，機身設計一樣咁簡約討好，加上機身顏色重有紅、銀、白三款俾你揀，男女潮人必Buy！
Profile
感光元件：640萬像素CCD
顯示屏：2.5”LCD
儲存媒體：SD卡（內置12MB）
尺寸：89.9×57.5×19.7mm
重量：118g
L1$2,580入門新貴
對學生哥嚟講，佢哋最想搵一部價錢唔貴，而且功能齊全嘅DC。L1配備600萬像之餘，也有5倍光學變焦鏡頭，加上採用AA電池，隨時更換都得，新機落地價$2,580，感覺相當抵買。
Profile
感光元件：1/2.5”637萬像素CCD
顯示屏：2.5”LCD
儲存媒體：SD卡（內置10MB）
尺寸：89.5×60.5×47mm
重量：180g
Nikon（29029005）