樓市暢旺，物業代理擴充步伐加快，好似利嘉閣咁，近日租用灣仔駱克道利臨大廈一樓全層六千五百呎，據悉，月租七萬，下月中負責寫字樓租售嘅部門就會搬過去。 地產界老友同蘭西講，利記現有三組員工負責寫字樓部，未來擴至六組，加埋後勤，人數百幾個。由於現時租用嘅同區中國海外大廈，單位面積僅二千幾呎，唔夠地方用，所以要租新址，而舊址據講留畀由九龍搬過嚟嘅香港商舖部用。