會計Ｙ於九九年考會考，中七之後到科技大學讀商學院，去咗一年外國做交換生，今年已經考會計師試。呢日佢與中學同學見面，諗起會考時期搏命補習之事，有如昨日。佢哋在沙田區名校讀書，學校會考成績極好，「攞Ａ」如斬瓜切菜，學校老師精於提供模擬答案，考會考照跟，就差唔多坐Ｃ望Ｂ，叻仔叻女如多啲料就會攞Ａ。但係學生仍然去新城市商場補習學校，覺得唔補就好蝕底。
明年輪到學生Ｙ考會考嘞，佢表哥與會計Ｙ係同學，從表哥口中知道九九年補習情況，講講吓，學生Ｙ話：「吓，乜幾年前你哋又係睇影帶呀，我啲同學都係噃。兩位英文老師『健與羅渣』套英文補習影帶，喺幾間補習中心同步播映畀學生睇，都唔知係唔係會計Ｙ哥哥六年前睇嗰套。」
呢條橋幾好噃，原來補習可以用咁嘅方法，夠晒「規模經濟」，唔怪得補習學校會賺到咁多錢。學生Ｙ讀嘅學校，亦係沙田地區名校，會考成績素來唔錯，表哥問學生Ｙ去唔去聽「健與羅渣」教英文，學生Ｙ話：「有乜好處呀，睇影帶啫；之不過，有百幾個會考班同學都去咗補，我似乎有啲蝕底噃！」
問題就在這裏，學生Ｙ要與阿媽、表哥開會，研究應否補習。阿媽話：「咁多同學去補習，不如你都參加啦，以免落後於人。」表哥當年自恃英文好，冇補英文，因「聆聽」（Listening）攞Ｅ，幾乎飲恨，至今百思不得其解，但冇所謂咯，已經攞咗倫敦大學碩士學位，重記住呢啲瘀嘢做乜？表哥亦叫學生Ｙ去補習噃：「補習先生會提供賽馬貼士，例如李華《弔古戰場文》係熱膽，冷腳係新詩三首，大冷門係黃國彬寫《聽陳蕾士的琴箏》，有時好準㗎，中咗就攞梗Ａ啦！」學生Ｙ聽咗為之大笑；香港讀書，係咁㗎啦，讀書唔係求知識，係為咗會考盡量攞Ａ。