大政策要和諧，班民主派議員卒之等到綠燈，今個月二十五號浩浩蕩蕩去珠三角考察，連長毛都收到回鄉證申請書，叫佢填表，惟獨已經卸任唔再做議員嘅華叔，加上佢係支聯會主席，就無法北返祖國。
八方問華叔有幾耐冇返鄉下開平，佢話自從四八年之後都冇返過去，因為佢冇乜親人喺內地，只係媽媽葬喺鄉下，九二年佢啲兄弟姊妹曾經回鄉掃墓，不過佢因為冇回鄉證冇得去，都有啲可惜。
八方問華叔點解解放後冇返鄉下，佢話嗰時兵荒馬亂，所以冇去，之後就工作忙，做基本法起草委員時佢重係小學校長，亦冇時間回鄉，八九民運後就冇得返啦，所以每年只好託人去母親墳前掃墓。
華叔今年七十幾歲，所以乜都冇所謂，但係佢仍要為六個今次可以回國嘅支聯會常委爭取，認為以後都應該可以回國，而非逐次批准、唔經司法程序就剝奪佢哋嘅公民權利。
邊六個？咪張文光、鄭家富、何俊仁、李卓人、梁耀宗同長毛囉。
傳真︰2623-9278
電郵︰[email protected]