呢排好多具重建價值嘅舊樓地盤放售，啱啱又有一單，紅磡新柳街一號及石塘街二號，兩幢舊樓相連，可以合併重建。
代理第一太平戴維斯住宅投資部助理經理馮偉全話，呢兩幢唐樓，地盤夾埋近二千呎，以九倍地積比率重建，可以起近萬八呎。
業主意向價三千五百萬，計落每呎樓面地價二千有找，只係一千九百五十一，相信可以吸引投資者及中小型發展商。
咁嘅細地盤，市面上唔少，不過，原來業主喺九二年開始，逐戶收購，前後用咗八年，共千五萬，到二○○○年，終於統一所有業權。佢重要等到𠵱家，樓市熾熱先至放售，認真有耐性。若果以意向價賣出，前後十三年，執兩千萬。
新柳街一號，高四層，佔地八百六十七呎，而石塘街二號，六層高，地盤有一千一百二十六呎，兩幢舊樓夾埋有十個單位。
電郵地址：[email protected]