劉浩龍日前被記者發現駐足於跑馬地地產公司門前，最後走入內與店員密斟十多分鐘。事後劉浩龍大吐苦水謂被業主大幅加租迫遷，故此要急急搵樓搬屋。
劉浩龍近日忙於宣傳即將推出的第三張專輯，工作排得密密麻麻，但日前記者卻發現他獨自在跑馬地蹓躂，並主攻地產公司，站在店舖門前的他表情甚為困擾。當劉浩龍連掃幾間地產公司後，似乎已鎖定目標，最後走進其中一間與店員密斟達十多分鐘。
無看更欠安全
記者上前和劉浩龍做訪問，劉浩龍即時大吐苦水，事緣他現居的寓所已住了兩年多，但近日業主竟狂加租，升幅高達四成，令劉浩龍十分無奈，他說：「其實我已經住慣咗，但係加咁多租就真係好唔合理，而且我住嗰度又冇看更，其實都唔係好安全，所以我都想搵屋搬。」
問劉浩龍為何不儲蓄買樓，為將來結婚作準備，他就坦言現在仍未有能力置業，但已訂下目標，希望用兩年時間儲錢。他說：「因為下年自己都三條嘢，身為男仔係時候要諗呢個問題，但𠵱家樓價重係好貴，對我哋呢啲新一代年輕人嚟講，都係有啲困難，惟有努力工作儲錢啦。」
採訪、攝影：駱華齡
