加入大陸彩票市場的看通集團（1059）已傳聞配股多時，終於在昨日停牌落實配股。江湖傳聞配股價0.73元，公司集資1.7億銀。
經紀黃話，據聞今次看通批股得以落實，要多得一班星洲芬佬鼎力支持，佢哋對神州大地的彩票業前景相當睇好，所以看通先至可以喺呢個高位批到股。
看通自公布沾手彩票以來，股價升咗好多，但阿媽冠軍科技（092）股價始終冇乜點升，情況與金屬電子交易所（8161）阿媽寶威控股（024）一樣，呢一點小初真係諗極唔明。
另外，曾於8月份批輪集資嘅中盈控股（766）一直穩步上升，股價累積升幅唔細。
經紀陳話，中盈早前宣布取得一項印尼瀝青油礦採礦權後，一直冇進一步消息，公司終於公布會喺下星期同證券界人士見面，解釋一吓個project，到時大家可以評估一吓呢個投資項目有幾堅。
中盈股價昨日跌5.48％，收0.69元，成交股數6635萬股，金額4557萬元。
慕容小初