發展商搞樓盤宣傳，最近一窩蜂勁sell同「食」有關嘅軟硬件，硬件係品牌煮食用具，軟件當然係星級廚藝啦！ 為咗令大角嘴君滙港住客，可以享受到一流飲食文化，新地代理執行董事周國賢話，公司搵到米芝蓮三星御廚去住客會所，為住客整餐色香味俱全嘅晚宴。 因為名廚難請，每年只可搞三四次，每次頂多兩圍，而且一定要預約。 噚日畀大家率先開吓眼界，見識米芝蓮三星御廚嘅功力，新地請咗大師MarcMeneau由法國飛過嚟，即場示範一道精緻生蠔菜，製作過程極之繁複嚴謹，唔係撬開個殼擺喺冰上面咁簡單。