童心與政治，竟然溝得埋。香港電台噚日開記者會，為佢哋個兒童故事演講比賽宣傳，順便公布埋由小朋友投票選出嘅最受歡迎童話故事人物。做嘉賓嘅勞工界立法會議員陳婉嫻，真係反應快，一知道最受小朋友歡迎嘅人物係孫悟空、哈利波特同阿拉丁，即刻用晒啲童話故事人物嚟比喻政界中人。
嫻姐首先就話，有一個長頭髮嘅男議員，好似孫悟空咁，嚟到立法會即刻搞亂晒啲議程。雖然大家都馬上諗到佢係講緊長毛，但唔知點解，嫻姐係都唔肯親口點長毛個名，莫非怕咗呢隻大馬騮？個司儀連番追問下，嫻姐重突然轉軚，話孫悟空可以比喻另一個政界中人，重叫在場人士估吓。
除咗長毛，重有邊個呢？嫻姐於是畀貼士，話呢個人係一隻「肥馬騮」，八面玲瓏，可以縱橫仙界魔界。呢個中秋燈謎都算深，正當全場人呆咗、無人諗到謎底之時，嫻姐惟有開古，話係政務司司長許仕仁。八方覺得，如果要肥龍扮一個西遊記人物，點都係扮豬八戒似啲啦！
政治古仔悶親小朋友
咁阿曾特首又似邊個呢？嫻姐話，煲呔成個阿拉丁咁，為香港人「擦」出好多奇迹。例如佢擦吓擦吓，令到「燈神」體諒香港立法會議員嘅心意，知道好多被人收咗回鄉證嘅立法會議員好想上北京，結果近日佢哋終於夢想成真，六十條友可以一齊上廣東。嫻姐講完之後，重問大家同意唔同意？可惜，坐喺台下嘅幾十個幼稚園小朋友鴉雀無聲，你眼望我眼，唔明佢講緊乜。嫻姐惟有自己打圓場，佢話香港人似哈利波特，六百萬人都係愛奮鬥、唔認輸，香港政局困難時，市民都仍然好高質素。香港人高唔高質素，八方唔敢評論，但嫻姐話煲呔「擦」出好多奇迹，呢個「擦」字，真係可圈可點。
講番港台個「兒童故事角色」選舉，一共訪問咗二百個小朋友，選出佢哋喜愛嘅角色，原來小朋友心目中，孫悟空最受歡迎、哈利波特第二、阿拉丁第三，近排好興嘅迪士尼人物白雪公主、睡公主、灰姑娘等，統統入圍，喺頭二十名中包辦咗十個位置。
各位讀者，有冇時間稍拾童真玩吓配對遊戲：長毛做孫悟空，煲呔做阿拉丁，肥龍做豬八戒，老董做唐僧，葉劉做巫婆，余若薇做白雪公主，李永達做小矮人……等八方搞番套政壇大鬧天宮！
爆料熱線：29290000、27860099
報料傳真：26239278
報料電郵：[email protected]