食過月餅，個市唔再悶極，恒指一彈就係258點。拉動大市功臣，係中移動（941）與和黃（013），分別升5.9%同3.8%，對恒指升幅貢獻總共168點。
滙控C輪4906：芬佬子彈，一排排射向重磅大藍籌。中移動成交大增3.5倍，和黃成交上升近1倍。滙控（005）噸位更重，遲早會成為芬佬追逐對象。滙控昨日升得20仙，墮晒後，趁低買定C輪。
滙控C輪熱門貨中，3408升9%，幅度最大。呢隻係搏殺格輪，槓桿率逾40倍。搵搏殺輪，又唔想太高溢價，4906係另1隻啱睇對象，明年1月下旬夠鐘，輪價26.5仙，溢價2.8%，槓桿率47.6倍（有效23倍），引伸波幅得9.9%。隻輪嘅槓桿率與引伸波幅夠晒吸引。
中電信C輪9048：中電信（728）雷打不動，企定喺2.825元，即係話有追落後條件，又係可以揀定啲C輪埋手。
中電信C輪波動最勁嘅，一定係4500，閒閒哋上落一兩成，所需時間只係1朝半日。唔想太刺激，可揀9048，明年3月夠鐘，溢價12.5%，槓桿率15.9倍（有效7.3倍），引伸波幅28.1%。溢價唔算吸引，但壽命長戥番。正股如果唔對辦，溢價都唔怕縮得太快。
章盛