關之琳昨日一身性感打扮參觀新樓盤，她直認曾與前度男友馬清偉及其前妻薛芷倫結伴夜蒲蘭桂坊，關之琳又自爆與薛芷倫是同學，她說：「佢係低我一班嘅同學。」
關之琳昨日參觀位於淺水灣道五十六號的豪華示範洋房，她穿上一襲性感大露背及開胸連身裙亮相，豔光四射。關之琳在活動上非常識做地大讚樓盤地段優越，之後獲大會送贈一套名貴茶具。
密封香閨保私隱
本報早前拍到關之琳與舊愛馬清偉及其前妻薛芷倫一起夜蒲蘭桂坊，關之琳昨日說：「係真嘅，不過唔好講係各自各精采囉！」問她與薛芷倫是否相熟？她說：「熟呀！以前我哋讀同一間學校，佢係低我一班嘅同學，好多嘢我覺得唔使澄清咁多。」
關之琳透露其香閨最近已完成裝修工程，不過她慨歎做藝人沒私隱，她說：「已經搬返屋企啦，不過成日都要落簾，好慘，我𠵱家一個月裏面，有三個禮拜都唔喺香港，都有少少唔想返嚟，不過始終屋企人又喺香港，又掛住啲雲吞麵。」
慨歎令朋友尷尬
關之琳又表示很多報道對她身邊的朋友不公平，對於早前被指與形象設計師友人Johnathan到中環夜店狂歡，關之琳說：「冇理由因為啲報道唔見朋友，不過實在令到啲朋友好尷尬，又話佢使我錢，又話佢幫我拎袋，佢係我形象指導，一齊去買衫，朋友嘅屋企人都會尷尬，佢哋個個都有正職，搞到我唔好意思。」
採訪：卓美娟 攝影：林德雄
