何韻詩前晚演出《梁祝下世傳奇》舞台劇的尾場,她的緋聞男友劉浩龍伴着何韻詩的雙親看騷。何韻詩穿上婚紗結束表演之際,顯得依依不捨,向觀眾致感謝詞時答謝已故恩師梅艷芳,還感動得眼濕濕。
何韻詩、周國賢和梁祖堯等前晚在灣仔演藝學院演出最後一場《梁祝下世傳奇》舞台劇,何韻詩的緋聞男友劉浩龍、密友容祖兒(Joey)、傅穎、徐克夫婦、楊千嬅、李心潔及男友彭順等都有往捧場。劉浩龍還十分識做,伴着何韻詩雙親同坐觀眾席。
「公司蝕錢都做」
何韻詩在演出尾聲時,向現場觀眾致辭,語氣十分激動,還講到眼濕濕,她說:「喺度我要多謝一個人(指梅艷芳),雖然佢今日嚟唔到,但係佢會睇到嘅。」何韻詩繼而用手指了一指天空,她續說:「我今晚尾場好唔捨得,我要多謝公司蝕錢都幫我做,我籌備咗半年,咁大個女都未試過咁辛苦。」
眾演員演出完畢後拉大隊到了銅鑼灣舉行慶功宴,阿詩更高興得滿場飛。對於演出的最後一幕穿上婚紗,意境跟梅艷芳死前的演唱會造型近似,阿詩說:「係小小心意,我每次出場都會諗起阿梅,我呢次同以往工作好唔同,希望佢可以睇得到。」
狂黐膠紙傷身
何韻詩獲悉這次演出令公司蝕本,問她可打算加場補數,她說:「成本太高,加場都cover唔到,我睇見工作人員拆台,我好唔捨得,心痛到想喊。今晚好多謝啲朋友嚟捧場,Joey重取消錄音趕嚟。」
此外,何韻詩的服裝很性感,黐了大量膠紙防走光,她說:「我起碼黐咗成萬張膠紙,頸同背脊搣膠紙時都損晒。」周國賢演出時因右膝護墊移位,故演出時不慎被台上的釘弄傷,他說:「我當時都唔知,後來先覺得好痛,成個膝頭腫晒,我好多謝阿詩搵我演出。」
採訪:駱華齡 攝影:葉君海、何國豪