美國地產大亨特朗普向紐約最高法院入稟，要求凍結香港富豪鄭家純、羅康瑞等人賣地所得之十七億六千萬美元，被法院駁回，法官指鄭家純等人可自行運用呢筆錢，亦指出鄭羅等人賣出曼哈頓一幅三十一公頃地皮之前，有五個買家入標，已經係以最好價錢賣出，冇「賤賣」土地。
特朗普喺一九九四年欠銀行二億五千萬美元，用該幅地皮抵押，因還唔到錢兼周身債，銀行以九千萬美元將筆貸款賣咗畀鄭羅等人，但係話明他日轉售時，特朗普可得售價三成，今鄭羅以高價賣出，賺到笑，但係特朗普唔記得鄭羅當日打救，反控鄭羅以低價沽售土地，令佢收少咗錢，要求賠償五億美元，實在令人覺得佢冇口齒。
賓架Ｐ在紐約打過工，做過好多債務重組，佢就話美國商人嘅諗法與亞洲人唔同，唔會認為任何商業行動之中，會有「打救」、「恩惠」、「捱義氣」呢類概念，只視之為利益交換。美國人打官司，司空見慣，往往只係一種談判招式，以入稟法庭嚟表示「我非常認真㗎，唔好當我冇到」之態度，逼對方與佢展開新一輪談判。但對亞洲華人嚟講，你唔掂之時，搵我注資，現在我以好價賣出，按協議分番三成畀你，你重告我，要我賠多你五億美元，你直情係王八蛋。
中美思想之不同，從特朗普控告鄭家純、羅康瑞案件，可見一斑。據商界人士講，特朗普一邊告上法庭，另一單生意就希望香港富豪合作入股，曾主動要求與香港富豪見面。有關富豪為之啼笑皆非，正是睬佢都儍，一於畀特朗普食檸檬。講做地產生意，特朗普叻唔過香港富豪，不過地產呢樣嘢，始終係地頭蟲惡啲，否則特朗普喺紐約唔會咁威。