港股真係有好大機會以橫行整固方式，拖長時間，嚟完成今次調整。恒指上周跌182點，噚日一日就收復晒失地，早段低開，但承接力好強，跟住有大盤殺到，係咁掃上去，愈升愈急，結果恒指以接近全日高位收市，大升258點，收15241，成交大增到213億元。期指收15235，亦大升259點。
大市明顯轉好，但唔排除短期仍會繼續橫行，有機會在上阻力的15300水平略作整固，然後再上衝15509的前高位，開展新上升浪。大市噚日發威，大藍籌由中移動（941）、長實（001）同和黃（013）做主力，至於滙控（005）就斯人獨憔悴，暫時大市嘅走勢係個別發展，噚日下跌股（不計認股證）重有成270多隻，二三線股大圍計，有排都未成氣候。
中移動大升2.05元，升幅近6%；和黃升2.85元，升幅3.7%。中移動全日個勢都好強，但尾市重犀利，幾分鐘內，由36元掃到上36.75元，結果收36.55元。中移動C輪全部飛升，3637在尾市兩分鐘亦急升，由0.60元掃到上0.68元，升多1成，雖然計價只係收0.63元，但仍大升37%。
目標價44.5元
和黃C輪在12大上升榜中，佔了10隻，有大成交支持的，以4897同9117最勁，分別大升63.6%同50%。和黃有消息，意大利3G業務將於今年底上市，估值120億歐元（約1130億港元），和黃出售25%可套現約240億港元。現時主要睇淡和黃係花旗，維持沽售評級，目標價69元。不過，看好的就有多家大行，目標價約在85至90元。
大地產股以長實最強，收84.50元，升2%；新地（016）則升1.6%；恒地（012）收38.35元，只升得0.65%。恒地未能跟上大圍升勢，同市場傳佢可能會伸手有關。
恒地通常都係慢熱，大市升浪確認後，恒地就會從後趕上。恒地最近購入澳門氹仔填海區一幅大型發展用地，涉資約40億元，計劃發展豪宅，可建樓面面積約1000萬平方呎，成個香港太古城咁大。花旗美邦報告就指澳門項目可令恒地每股資產淨值增加0.80元，現時股價有32%折讓，維持「買入」評級，目標價44.50元。
郭兆誠