啱啱喺亞洲男子籃球錦標賽帶領中國隊四連冠嘅姚明，噚日到港，幫「中國愛滋病防治」活動宣傳，原來佢為咗做宣傳大使，唔單止馬不停蹄，重搞到同家人中秋團圓嘅機會都冇。
話說姚明本來可以喺上周日返上海見下家人同女友，一家團聚過中秋，但佢為咗幫上海市做宣傳，飛咗去日本愛知縣，為世博會中國館嘅上海周做形象大使，噚日又嚟咗香港做預防愛滋嘅宣傳大使。
雖然舟車勞頓，七呎五吋高嘅姚明，唔單止全程笑容滿面，重預備咗親筆簽名嘅籃球、波衫同埋海報，用嚟拍賣籌款；星期四下午更會喺灣仔伊館同本地年輕人對話，討論預防愛滋病。唔少得嘅梗係示範精湛球技啦！佢二十二號就會返上海，二十六號返休斯頓備戰新球季。計落佢由亞錦賽開波到返美國，真係一日都冇唞過。
爆料熱線：29290000、27860099
報料傳真：26239278
報料電郵：[email protected]